¿Cai folletopa fotocunapica testigo de Jehovacuna aliguta mudarishpa tandanajuicunaman rinajujta ricupanguichu? ¿Imamandata limpio, aliguta mudarishpa purinchi?

Diosta respetashcamanda. Taita Diosca gentecuna ali mudarishcatallaca na ricunllu (1 Samuel 16:7). Shinapash Diosta adorangapaj tandanajushpaca ñucanchi huauquicunatapash Diostapash respetashcamandami aliguta mudarishpa ripanchi. Yuyapai. Presidente shamujujta uyashpaca ¿nachu presidenteta respetashcamandaca aliguta mudarishpa ricungapaj ripanguiman? Shinallatami tucui llactacunata ‘Jatun Mandaj’ Diostapash, Tandanajui Huasitapash respetashcamandaca aliguta mudarishpa tandanajuicunamanga rina capanchi (Jeremías 10:7).

Bibliapi nishcata pactachishcamanda. Bibliapica Jesusta catijcunataca ninmi, ‘munanayai, pinganayai’ ropataca na churajunachu canguichi nishpa (1 Timoteo 2:​9, 10). ‘Munanayai, pinganayai’ ropata na churajunachu canguichi nishpaca maipash cachun, mapa o pipash munashpa ricuchunlla ajustado ropata na churajunatami nijun. Chai textopi ima nishcata catishpapash cada unomi aliguta pensarishpa, ali agllashpa churajuna capanchi. Aliguta mudarishpaca ‘Quishpichij Taita Diosmanda yachajuna juyailla cajtami’ ricuchishun. Jehová Diostapashmi alicachishun (Tito 2:10; 1 Pedro 2:12). Aliguta mudarishpa tandanajuicunaman rijpica, Jehová Diosta sirvijcuna cajtami shuj gentecunaca cuenta japinga.

Ali ropaguta na charimandami tandanajuicunamanga na rita ushapani nishpaca na llaquirinachu capangui. Aliguta mudaringapaj, limpio cangapaca valishca, mushuj ropata charinaca na minishtirinllu.

• Tandanajuiman rinajushpaca ¿imamandata aliguta mudarishpa rina ali can?

• Imashina mudarinata yachangapaca ¿maijan textota ñucanchita ayudai ushan?