Teʼ folletoaʼ, ¿tsʼoʼok wa a wilik bix maʼalobil u vestirmiluba u j-jaajkunajoʼob Jéeoba ken xiʼikoʼob teʼ muchʼtáambaloʼoboʼ? ¿Baʼaxten jach k-kanáantik le bix k-líiʼsikba yéetel le bix k-vestirtikbaoʼ?

Utiaʼal k-eʼesik tsiikil tiʼ Dios. U jaajileʼ maʼ tu páajtal k-tusik Dios yoʼolal le bix k-vestirtikbaoʼ (1 Samuel 16:7). Baʼaleʼ ken xiʼikoʼon k-adorart Dios teʼ muchʼtáambaloʼoboʼ, jach k-kʼáat eʼes tsiikil tiʼ letiʼ bey xan tiʼ k-sukuʼunoʼob. Wa ka yanak k-bin tʼaan tu táan juntúul juezeʼ, maʼ xaaneʼ yaan k-ilik vestirtikba tubeel utiaʼal k-eʼesik jach k-tsikik le nojoch páajtalil yaantiʼoʼ. Bey túun xanoʼ, le bix k-vestirtikba ken xiʼikoʼon teʼ muchʼtáambaloʼoboʼ ku yeʼesik jach k-eʼesik tsiikil tiʼ Jéeoba, u Juezil «tuláakal le yóokʼol kaaboʼ», bey xan tiʼ le tuʼux k-muchʼikba utiaʼal k-adorartoʼ (Génesis 18:25).

Utiaʼal k-eʼesik máax nuʼuktik k-kuxtal. Le Bibliaoʼ ku yaʼalik tiʼ le máaxoʼob meyajtik Dios ka u vestirtubaʼob «yéetel kabal óolal bey xan yéetel maʼalob tuukul», jeʼex u páaʼtaʼal ka u beet le máaxoʼob «meyajtik Diosoʼ» (1 Timoteo 2:9, 10). U vestirtkuba máak «yéetel kabal óolal[eʼ]» u kʼáat u yaʼal maʼ u tsʼáaik nookʼ utiaʼal ka jach chaʼantaʼak, ka u beet u tuklaʼal baʼal kʼaas wa jach sáaskʼaleʼen. Le «maʼalob tuukul» xanoʼ ku yáantaj utiaʼal u vestirtkuba máak jatsʼuts, junpʼéel bix maʼ kʼaas u yilaʼal yéetel maʼ jelaʼaniʼ. Baʼaleʼ le baʼax ku yaʼalik le Bibliaoʼ, chéen ku yáantkoʼon k-yéey le nookʼ ken k-tsʼáaoʼ. U vestirtkuba máak junpʼéel bix jatsʼuts u yilaʼaleʼ jeʼel u jatsʼutskíintik «u kaʼansaj Dios, le k-Salvadoroʼ», yéetel jeʼel u tsʼáaik nojbeʼenil tiʼ sin ke k-aʼalik mix junpʼéel tʼaaneʼ (Tito 2:10; 1 Pedro 2:12). U líiʼskuba máak maʼalob ken xiʼik muchʼtáambaleʼ, yaan baʼax u yil yéetel le baʼax ku tuklik le máakoʼob yoʼolal u kaajal Jéeobaoʼ.

Utiaʼal u pʼáatal limpio máak yéetel u vestirkuba tubeeleʼ, maʼ tsaaj ka u tsʼáa koʼokoj nookʼoʼobiʼ. Maʼ u pʼáatal maʼ a bin tu Najil Reino chéen tumen maʼ jach maʼalob bix a nookʼiʼ.

• ¿Baʼaxten jach maʼalob ka k-il bix k-vestirmakba ken xiʼikoʼon k-adorart Dios?

• ¿Bix jeʼel u yáantkoʼon le Biblia utiaʼal k-líiʼsikba yéetel k-vestirtikba tubeeloʼ?