Ɔzʋmɩ tɩɩtɩɩ mmɩlɩ nu nɩ la yɛɛ Gyehova ɩbɛlɩ yɩ kɛɛ, abusunwa bela bekele mmɩlɩ bekeyiyia numɔ na bɛahyɛ abusunwawɔlɛ mɔɔ ɩwɔ bɛ nɩɩ Gyehova nɩɩ abusunwamaa yɩ nu nɩ ɛzɩzɩbɛ a. (Deuteronomy 6:6, 7, NW) Eyi ti mɔ Gyehova Dasɩvʋlɔmaa bɛyɩ mmɩlɩ be besiye ahanlɩ wɔ dapɛnɩ bela nu na bɛava bɛayiyia numɔ kɛɛ abusunwa na bɛazʋ̃mɩ—wɔ anyɩnlɩlelɛ nɩɩ azʋ̃nudwolɩyɛ ɔhʋanɩ zʋ nɩ, bosunzu sunzuma nu nninyeni mɔɔ ɩfalɩ bɛ ahyinyiadɩ pɔkyɩ̃ɩ̃ nwʋ. Sɛ wʋzawʋ nkʋ̃ la yɛɛ ɛda po a, eyi ɩkɛyɛ ɔnwʋmɔ ɔhʋanɩ mɔɔ ɔkɔhʋla ekeɣike Nyamɩnlɩ iluwa Bayɩbʋlʋ dɩyɛzumanlɛ nwʋ nhyɩhyɛlɩyɛ ba mɔɔ ɛkɛyɛ nɩ zʋ.

Ɩdɩ mmɩlɩ mɔɔ ɩma abusunwa yɩ bike Gyehova. “Mʋnlʋmmɔ bɔhwɩ̃ beɣike Nyamɩnlɩ na yɩzayɩ sʋ̃ ɩkɔhwɩ̃ ikeɣike mʋnlʋmmɔ.” (Gyemisi 4:8) Yɛba yɛnwʋ Gyehova bʋwɔ mmɩlɩ mɔɔ yesuma enii ɔkʋ̃ mɔɔ ɩdɩ nɩɩ ɩ nyɛlɩyɛ nwʋ dɩyɛ yɛkɔ aɣinzi bʋwɔ iluwa yɩ Odwokɔ Bayɩbʋlʋ yɩ zʋ nɩ. Ɔhʋanɩ mɔɔ ɩyɛ mɛlɛkɛ mɔɔ ɔkɔhʋla ɔkɔwɔ wʋ abusunwa ɔzʋ̃mɩnlɛ yɩ tʋ nɩ yɛ lɛ kɛɛ, bekenyia mmɩlɩ bɛkɛɣɩnga Bayɩbʋlʋ bɔkɔwɔ onumɔ, ebiye a bɔkɔhʋla bekeli dapɛnɩ dapɛnɩ Ɛbɩlawɔlɛ Nɩɩ Dasɩlɛlilɛ Ayiyialɩyɛ nhyɩhyɛlɩyɛ yɩ mɛda. Bɔkɔhʋla bɛkɛhyɩhyɛ Bayɩbʋlʋ yɩ ɔfʋã azʋlɔtʋ nɩ bɛkɛma busunwanii bela ma ɩkɛɣɩnga na akʋ̃ bɛazunzu mɔ bozumanlɩ yɩ wɔ Ɛhɛlɛlɛ Odwokɔ yɩ nu nɩ nwʋ.

Ɩdɩ mmɩlɩ mɔɔ ɩkã abusunwa yɩ nu maa munwala ɩbɔ numɔ. Ohunɛmaa nɩɩ ɛyɩlɛmaa, ɩnɩ awʋvʋlɔ nɩɩ nnwuakula bɔkɔhʋla bɛkɛhyɛ abusunwawɔlɛ mɔɔ ɩwɔ bɛ avinli nu ɛzɩzɩbɛ mmɩlɩ mɔɔ bosuma Bayɩbʋlʋ yɩ bɔbɔ numɔ kɛɛ abusunwa nɩ. Ɩsɛ kɛɛ ɩyɛ anyɩnlɩlelɛ nɩɩ azʋ̃nudwolɩyɛ mmɩlɩ mɔɔ busunwanii bela ikila ɔhʋanɩ wɔ dapɛnɩ bela. Awʋvʋlɔ bɔkɔhʋla bekehila alʋbɔ mɔɔ bo nnwuakula beli yɩ nɩ zʋ bɛkɛyɩ ndwokɔ abɔkɔ mɔɔ ɩkɔhʋla ɩkɔwʋwa bɛ, ebiye a, bɔkɔhʋla bɛkɛva ndwokɔ mɔɔ ɩwɔ Watchtower nɩɩ Awake! yɩ nu anzɛnyɩɩ mɔɔ ɩwɔ yɛ wɛbsayɩtɩ yɩ zʋ wɔ jw.org. Bɔkɔhʋla bɛkɛhã ndwokɔ ɛzɩzɩbɛ mɔɔ nnwuakula beyiyialɩ wɔ sukuulu nɩɩ kɛmɔ bɔkɔhʋla bekeli ɔnwʋmɔ egyima nwʋ ndwokɔ. Mɩnla ti mɔɔ bɛahila egyimalilɛ azʋlɔtʋ be mɔɔ ɩwɔ JW Broadcasting (tv.pr418.com) ɩzʋ nɩ na bɛawɔ numɔ bɛazunzu nwʋ a? Sa bɔkʋla sʋ̃ bosuma ndwomi mɔɔ yɛkɔdʋ wɔ ayiyialɩ­yɛ yɩ tʋ na bɛale bɛanyɩ wɔ abusunwa ɔzʋ̃mɩnlɛ yɩ awielɩyɛ.

Ɔzɔ mmɩlɩ sʋnʋnkʋ̃ eyi mɔɔ beyiyia nu dapɛnɩ bela bɔsʋ̃mɩ Gyehova bɔbɔ numɔ nɩ ɩkɔwʋwa busunwanii bela ma ikenyia anyɩnlɩlelɛ wɔ Nyamɩnlɩ Odwokɔ yɩ zumanlɛ nu, na ikeyila bɛ mmɔdɩnɩ yɩ zʋ sʋ̃maa.—1 Timoti 4:15, 16.

• Mɩnla ti mɔɔ yɛyɩ mmɩlɩ yesiye ahanlɩ yɛyɛ abusunwa ɔzʋ̃mɩnlɛ a?

• Kɛ ɩkɛyɛ na awʋvʋlɔ bɛama abiyela mɔɔ ɩwɔ abusunwa yɩ nu anyɩ ale wɔ ɔzɔ mmɩlɩ yɩ nu a?