Saa yellun diya, Yehofa kĩ yɛnu baagere ga n da saa di sannu, gu ka gen bɔrɔnu ka Gusunɔ dam sosi kpa yɛnu ge, ga n ka dam mɔ. (Sɔ̃ɔsiru 6:6, 7) Yen sɔ̃na Yehofan Seeda Diobun yɛnu baagere ga ra saa yi arusuma baayere, ga n da ka mɛnnɛ gu sãaru ko. Saa ye sɔɔ, yɛnugibu ba ra wesianɛ laakari kpindu sɔɔ, kpa bu ye Gusunɔn Gari ya gerumɔ ben bukataba sɔɔ daari. Baa à n sãa tantanɔ, kaa kpĩ a saa yi a ka Gusunɔn Gari yi a gɔsan keu ko kpa a Gusunɔ susi a sosi.

Saa ye kaa ka Gusunɔ susi a sosi. “I Gusunɔ susio, u koo maa bɛɛ susi.” (Yakɔbu 4:8) Bɛsɛn yɛ̃ra koo kpɛ̃a Yehofa sɔɔ, ma sa win daa ka win kookoosu mɛɛrimɔ win Gari sɔɔ. I nɔɔ sua wɔllɔ i ka bibeli gari sannu ya sãawa swaa ye ya ǹ sɛ̃ i ka bɛɛn yɛnunn sãaru tore. Sɔrɔkudo, i ko i Bibelin garibun kpunaa arusumagia swĩi; kpunaa ye, ya wãa tire te ba mɔ̀ Cahier pour la réunion Vie chrétienne et ministère sɔɔ. I ko i kpĩ i gari bi bɔnu ko. I n gara i kpa, i ko i kpĩ i wesiana sɔ̃ɔsi te baawure u swaa gari bi sɔɔ.

Saa ye yɛnu teun tɔmba koo ka susisina n sosi. Durɔbu ka kurɔbu, mɔwɔbu ka bii ba koo ben kĩru dam sosi ben tii tiinɛ sɔɔ, sanam mɛ ba Bibelin keu mɔ̀ sannu yɛnu sɔɔ. Saa ye, ya kon sãawa nuku dobu ka laakari kpindun saa, baawure kon yen bɛkɛ barɔwa arusuma baayere. Mɔwɔ ba koo bibun wɔ̃ɔ mɛɛri bu ka sɔ̃ɔsinu gɔsi ni sɔɔ ba koo wesiana. Sɔrɔkudo, tire te ba mɔ̀ La Tour de Garde sɔɔwa ba koo gɔsi, aawo Réveillez-vous sɔɔwa, ǹ n maa bɛsɛn intɛɛnɛtin ayeru jw.org sɔɔwa. I ko i kpĩ i wahala yi bɛɛn biba waamɔ keu dirɔn gari ko, kpa i ka be mɛɛri mɛ ba koo ka yi kamia. I ko i maa kpĩ i bɛsɛn telen kpunaa mɛɛri, JW Télédiffusion intɛɛnɛti sɔɔ (tv.pr418.com), ì n kpa i wesianɔ ye i mɛɛra sɔɔ. I ko i kpĩ i womu si ba koo ko mɛnnɔsu sɔɔ ko ka nuku dobu. I ko i maa kpĩ i dɔkɔru yɛmiasia, ǹ kun mɛ i gãanu di i n yɛnun sãaru kpa.

Ma a saa yen bweseru yi nɛnɛm arusuma baayere a ka Yehofa sãamɔ ka wunɛn yɛnugibu sannu, ya koo bɛɛ kpuro somi Gununɔn Gari yu ka bɛɛ dɛɛra n sosi; kookari ye a mɔ̀ swaa ye sɔɔ, ya koo ka nun doma bakaru naawa.—Womu 1:1-3.

• Mban sɔ̃na sa ra saa yi yɛnun sãarun sɔ̃?

• Amɔsunwa mɔwɔ ba koo de saa ye, ya n ka sãa saa nuku dobun ben yɛnugibun sɔ̃?