Kabini san caman, Jehova sago ye ko denbaya kɔnɔ mɔgɔw ka waati kɛ ni ɲɔgɔn ye, walisa u ka dɔ fara u ni Jehova ka jɛɲɔgɔnya ani u ni ɲɔgɔn cɛ jɛɲɔgɔnya kan. (Dutɛrɔnɔmɛ 6:6, 7) O de kama Jehova Seerew bɛ waati ta dɔgɔkun kɔnɔ walisa ka Jehova bato ni u ka denbaya ye, u bɛ baro kɛ nisɔndiya kɔnɔ alakow kan u mago bɛ minnu na. Hali ni o y’a sɔrɔ, i b’i kelen na, i bɛ se ka waati dɔ di Ala ma i kɛtɔ ka Bibulu barokun dɔ kalan min ka di i ye.

Waati don walasa ka gɛrɛ Jehova la. “A’ ye gɛrɛ Ala la, ale fana na gɛrɛ aw la.” (Yakuba 4:8) An b’a dege ka Jehova dɔn an kɛtɔ k’a ka jogow dɔn ani a ka kɛwalew minnu bɛ sɔrɔ a ka kuma sɛbɛnnenw kɔnɔ. Fɛɛrɛ nɔgɔnma min bɛ walisa ka denbaya ka kalan sigi sen kan, o ye ka Bibulu kalan ɲɔgɔn fɛ ka aw kan bɔ, laala aw bɛ se k’o kɛ aw kɛtɔ ka tugu Ɲɛnamaya ani waajulibaara lajɛ ka porogaramu kɔ, dɔgɔkun ta. Denbaya kɔnɔ mɔgɔ kelen-kelen bɛɛ bɛ se ka yɔrɔ dɔ kalan. O kɔ, bɛɛ bɛ se ka ɲɛfɔlikɛ a ka faamuta kan.

Waati don denbaya kɔnɔ mɔgɔw ka gɛrɛ ɲɔgɔn na. Ni furu cɛ ni furu muso, ani bangebagaw ni denw bɛ Bibulu kalan ɲɔgɔn fɛ u ka jɛɲɔgɔnya bɛ kɔgɔ. O waati ka kan ka kɛ nisɔndiya ni hɛrɛ waati de ye, denbaya kɔnɔ mɔgɔw bɛɛ bɛ min kɔnɔ ni kɔrɔtɔ ye. Bangebagaw dɔw bɛ barokunw sugandi ka kɛɲɛ ni denw si hakɛ ye, o barokun bɛ se ka kɛ gɛlɛyaw kan minnu bɛ u sɔrɔ lakɔliso la ani olu ɲɛnabɔ cogo. Misali la, u bɛ baara kɛ ni La Tour de Garde ani Réveillez-vous! kɔnɔna kuma dɔw ye walima u bɛ o kɛ ni an ka ɛntɛrintɛti siti ye ni o ye jw.org ye. Mun na aw tɛ an ka tele porogaramu lajɛ JW Broadcasting (tv.pr418.com) kan ani ka baro kɛ o kan kɔfɛ. Min ka di dɔw ye, o ye ka u dege kantikiw dali la lajɛw kama, ani ni u tilala denbaya ka kalan na, u b’a kɔlɔsi ko ka minfɛn dɔ min ani ka dumuni dɔ kɛ, o ye ko duman ye.

Dɔgɔkun o dɔgɔkun, ka Jehova bato nin waati kɛrɛnkɛrɛnnenw na, o bɛ denbaya dɛmɛ Bibulu kalan ka ja u ye, o la aw bɛ cɛsiri min kɛ, siga t’a la ko Jehova bɛ duba o ye.—Zaburu 1:1-3.

• Mun na an bɛ waati ta denbaya ka kalan kama?

• Bangebagaw bɛ se cogo jumɛn na ka o waati kɛ nisɔndiya waati ye denbaya kɔnɔ mɔgɔw bɛɛ bolo?