Mulai jaman si adi nari, Dibata Jahwe ateNa gelah tiap-tiap keluarga pulung guna mpegegehi kerohanin ras hubungen keluarga. (Ulangen 6:6, 7) Eme sabapna engkai maka tiap-tiap keluarga Saksi Jahwe mereken waktuna tiap minggu guna ras-ras ngikuti ibadah keluarga​—mbahas erbage hal rohani si isesuaiken ras keperlun keluarga i bas waktu si tenang. Amin gia Kam tading sekalak, banci ka iserapkenndu waktu guna mperembak dirindu ras Dibata alu mpelajari salah sada topik Pustaka si Badia.

Waktu guna mpegegeh kerembakenta ras Jahwe. ”Rembakkenlah dirindu ku Dibata, e maka Ia pe ngerembakken diriNa man banndu.” (Jakup 4:8) Alu mpelajari biak-biak Jahwe ras tindakenNa i bas Pustaka si Badia, lebih itandai kami Ia. Sada cara si menukah mbenaken ibadah keluarga eme ras-ras ngoge Pustaka si Badia alu sora si megang, mungkin erpalasken jadwal minggun bas Perpulungen Pelayanen ras Kegeluhen. Tiap anggota keluarga banci pegancih ngogeken sada bagin i bas Pustaka si Badia, kenca e ras-ras mbahas kai saja pelajarenna.

Waktu guna mpegegeh persadan i bas keluarga. Perbulangen ras ndehara, bage pe orang tua ras anak-anak, banci mpegegeh hubungenna paksa ras-ras erlajar Pustaka si Badia. Si e arus me jadi waktu si meriah janah si itimai tep-tep minggu. Mpertimbangken umur anak-anak, orang tua banci milih topik-topik si apai si cocok ipelajari, mungkin alu nggunaken erbage rubrik i bas Sora Ermomo ras Sadarlah! ntah pe i situs web kami, jw.org. Kam banci ncakapken persoalen si nihadapi anak-anakndu i sekolah ras uga cara ngatasisa. Banci ka nonton program televisi JW Broadcasting (tv.pr418.com) janah ras-ras mbahassa. Kam pe banci latihen ngendeken ende-enden si man endenken i bas perpulungen ras man pangan-pangan kenca ibadah keluarga.

Acara istimewa guna ras-ras nembah Dibata Jahwe tep-tep minggu nampati kerina anggota keluarga njadiken Kata Dibata keriahenna. Dibata pe pasti alu simpar masu-masu usahandu erbahan ibadah keluarga.​—Masmur 1:1-3.

• Ngkai maka iserapken kami waktu guna ibadah keluarga?

• Uga nge carana gelah orang tua banci njadiken acara enda meriah man kerina anggota keluargana?