Ta fe mbwe, Yaweh Nsi naʼ kô mbe ba tunndà nke nkùmde num neso kù num bo num bag ywèle, mbèn so neta ntùm tunndà. (Nebwôgde 6:6, 7) A yennà bèn ngù kà Ghakwénta Yaweh Nsi nke njab metsit ngelañ ntùm ngabnjù netamde ngamdʼé bo tunndà, nke nswade ntshob ntùm nebotte, num ba tshu ywèt tsʼa tshwèt ndôde yub ngùtni là. Mba ngelañ o num ntswe tùʼ o là, o kuʼni neloʼ ngelañ neziʼde tshu tsʼo tshoʼ là mfà num Nsi.

A nke mbʼa ngelañ neghebte Yaweh Nsi. “Bin kùʼde nseʼ mbañ Nsi, aʼ kùʼde nseʼ mbañ bin.” (Yakobo 4:8) Nelèn Yaweh Nsi mebwô bʼa neziʼde mèn zʼa be yi là mbèn ndèn mba ngùninu mi ntùm Nwaʼni Nsi. Mat zʼa fiag netoʼde ziʼde tunndà là bʼa nesiañ Ñwaʼni Nsi bo tunndà, tshag là so tù, moʼndù nke mbét nkazin ziʼde ngabnjù Yôg mènkristô bo nàfaʼ. Be bo fà taʼ bag i nesiañ mba zit mèn no ntùm tunndà, kà ngù nswade ntshob mfà num ju bo ziʼde bwe là.

A bʼa taʼ ngelañ neghebte mba zit mèn no ntùm tunndà. Bandum, bènnzwi, mba ba tà boa bônkeʼ num kut yub kushun ngelañ bo num nziʼde Ñwaʼni Nsi ntùm tunndà là. A bwô a bʼa taʼ ngelañ tsiañde bo fide bo tshwèt mbéb ntùm ngabnjù là. Ntshùade num nguʼnjù bônkeʼ, tà bon kuʼni netshoʼ tu ntshob boa bo swade là, moʼndù ndoʼ taʼ tu ntshob Ndiañ Ntom ke Réveillez-vous !, kà num zeben koñnkùn jw.org lo. O kuʼni netshob nu mfà num ba ngùtni bon tsho num ngù dùʼ ñwaʼni là, mbèn ngù mba bo kuʼni nemaʼ ntshùa là. Bin kuʼni neyen mba netshañ ñwù ntùm Ngùayen JW num koñnkùn (tv.pr418.com), mbèn nswade ntshob num bwe. Bin kuʼni nebèn njob ba nkwi bo nsi yob ndà ntseʼde là mbèn njù metsit ju ngelañ ziʼde tunndà mi là.

Yen ngelañ ndùb netôg njoñ ngabnjù fa num netamde ngamde Yaweh Nsi bo yu tunndà aʼ ywimdʼo neghù tsiañde num nesiañ Ñwaʼni Nsi, mbèn nañ mbotni num yu kagtùn.​—Yobkwi 1:1-3.

• Numke a mbwô nefon ngelañ num ziʼde tunndà à?

• Ba tà bon kuʼni neghù à ke tsiañde be ngelañ ziʼde tunndà à?