Penaro weiniomboro Jehoba otasakakon woseʼnanopïseinie ma yòrupïatoʼkonʼme osekaro tïmïaro osepaname yeijïkon poriʼchomatoʼme iʼyainie, yotuputïʼmatoʼkonʼme eropa juʼpïa emandoʼkonʼme. (Deuteronomy 6:6, 7) Ijokero Jehoba poko Wòrupïatonon tïpo Opoto Papaʼwa tïwòkunamatoʼkon kuriʼchanorï amu ïaton ekemaʼpa sundaka otasakame tïwòkunamatoʼkonʼme iʼya​—òtïkonʼwa èsiʼmiaʼpame kïnòrupïaton Opoto Papa Karetarï tanokon poko, tomamïrïkon ta aʼkusepa tïweʼchoʼkon. Òʼwinie owemamïrï yako rorïpïo, Opoto Papaʼwa owòkunamatopo kuriʼchanorï juʼpïa maʼkuapa òtïkon poko owòmepase oweʼchokonïmbo poko Charetarï weinio.

Jehoba ponaro naka noro weʼchopo kuriʼchanorï moro. ‹Opoto Papa ponaro naka èʼcho, ijombo moʼko eropa oponaro naka kïneian.› (James 4:8) Ambore noro juʼpïa Jehoba kïsuputïʼmatomba kïwòmeparïkon mero emerïkon poko Charetarï weinio, neiara òtïkon poko yeijï eropa. Otasakame owòkunamarïkon kuriʼchanorï ambïako mapoiʼpioaton Opoto Papa Karetarï èrupïarï ke, ambïako moro ekemaʼpa sundaka tòrupïamïn me ïrïʼpïo weinio moro kïwoseʼnanoʼtoʼkon po kïwòmepatoʼkon karetarï tano. Asi meʼme Opoto Papa Karetarï ta tòrupïamïnme ïrïʼpïo ambïako mèrupïapoa oyasakarïkonʼwa, ijombote òtï poko yeinio owòmepaʼmasan poko mòrupïaton.

Juʼpïa noro otasakakon wòtuputïʼmatopopa moro. Mïinionanokon maro pïtïanokon, tïʼmakon maro eropa mïtuwaroʼmanamon, ambore nekatu otapokume kïnemainiaton ekemaʼpa roten osekaro Opoto Papa Karetarï poko tïwòmeparïkon yako. Towaʼpore weʼchopome moro kuriʼcha tïweíshe ma, ekemaʼpa sundaka joke tïwòmeparïkonʼwa kïnoʼposaton. Oʼtoro siricho tïʼmakon weijï poko chuwaroʼmanamon kïnupusaton òtïpangon poko tïʼmakon emeparïkon, ambïako moro The Watchtower maro Awake! karetarï tanokon poko, ijoseʼpa naʼna websaitïrï jw.org tanokon. Ambïako yòmepatoʼkon po òtï eiʼpiopïn tïweiye ma, moro pokoro joke iʼyainie oweuranaye moro poko oʼto tïweijïkon upuʼtoʼme iʼyainie. Oʼtoropa JW Broadcasting (tv.pr418.com) tano amu piʼcha enerï yako oʼwaine, ijombo te enemaʼpo mero owòrupïarïkon yako pioko? Kïwoseʼnanoʼtoʼkon po tuʼkumïngon warekon poko owòmeparïkon yako juʼpïapa eropa ma, ijombote owòmepaʼmasan paʼpopo ambïako asi òtïmbo amu menasaton.

Ènï paʼme ekemaʼpa sundaka otasakame Jehobaʼwa wòkunamano, paʼpororo oyapokurukonme Opoto Papa Karetarï poko owòmeparïkon ïrïʼmapoamba, juʼpïa neroten eropa moro poko tope owèʼkurukon epatomanopa Jehoba.​—Psalm 1:1-3

• Oʼtonoʼme tïpo amu Opoto Papaʼwa tïwòkunamatopo kuriʼchanorï ïan naʼna?

• Neiara mïtuwaroʼmanamon ènï kuriʼcha ïatomba amu towaʼpore weʼchopome paʼpororo toʼtï tanokonʼwa?