Seni chék me lóóm, Jiowa a mochen pwe eú me eú famili epwe awora ar fansounfengen le apéchékkúla ar riri ngeni I me ririfengen lón ar famili. (Tuteronomi 6:6, 7) Ina popun Chón Pwáraatá Jiowa ra áimuóló och fansoun iteiten wiik, fán iten ewe famili fel. Ra pwóróusfengen lón eú napanap mi kinamwe usun ekkewe mettóch mi weneiti ar riri ngeni Kot, nge epwe áwenewen ngeni minne mi lamot ngeniir. Pwal mwo nge ika ka chék áláemén ena káéén Paipel ka filatá ina ewe fansoun mi lamot pún ka áeá fán iten Kot.

Eú fansoun sipwe alapaaló ach arap ngeni Jiowa. “Oupwe arap ngeni Kot, iwe, epwe arap ngenikemi.” (James 4:8) Sia sileéchú Jiowa atun sia káé pwóróusen napanapan me féfférún kewe seni an we Kapas ewe Paipel. Eú alen mecheres le poputááni óm famili fel, ren ámi álleanifengeni ewe Paipel fán léúwommóng eli ren ámi fiti ewe kókkótun álleaan Paipel iteiten wiik lón ewe Manawach me Ach Angangen Afalafal Mwich. Emén me emén chón ewe famili epwe álleani kinikinin ewe álleaan Paipel, iwe mwirin repwe pwóróus wóón met ra káé seni ekkena wokisin.

Eú fansoun chón ewe famili repwe ririéchfengen. Epwe péchékkúleló ewe riri lefilen pwúpwúlú, sam me in me pwal ekkewe semirit, atun repwe káé ewe Paipel lón ar famili. Ina ewe fansoun mi apwapwa, ekinamwe me aúchea lón eú wiik. Ekkewe sam me in ra tongeni filatá met sókkun pwóróus mi fich repwe káé, eli lón ekkewe Leenien Mas me ekkewe ekkóch puk are seni ám website, jw.org, nge epwe lóngólóng wóón ierin néúr kewe. Oua tongeni fós usun eú osukosuk néúmi kewe ra kúna lón sukul me ifa usun repwe pworacho ngeni. Pwata ousap katol eú kachito lón JW Broadcasting (tv.pr418.com) me mwirin oupwe pwóróusfengen wóón? Eli oupwe pwapwaiti le asóssót ekkewe kél oupwe eáni lón ekkewe mwich me mwirin ewe famili fel, oupwe ekis mwéngéfengen.

Ei fansoun fel ngeni Jiowa mi kkóló aúchean iteiten wiik, epwe álisi meinisin chón ewe famili le pwapwaiti le káé án Kot Kapas, me Jiowa epwe unusen efeiéchú ámi achocho.​—Kölfel 1:1-3.

• Pwata sia áimuóló och fansoun fán iten famili fel?

• Ifa usun ekkewe sam me in repwe féri pwe ena fansoun epwe apwapwa ngeni meinisin chón ar famili?