Hlanlio chan in, Jehovah nih chungkhar pawl kha hmunkhat ah caan hmangṭi hna seh ti a duh hna, zeicahtiah mah nih Pathian he pehtlaihnak ṭha a ngeihter hna lengah pakhat le pakhat an i pehtlaihnak zong a fehter caah a si. (Deuteronomi 6:6, 7) Cucaah Jehovah Tehte Hna nih zarhkhat ah voi khat chungkhar pumhnak tuah awkah caan an khiah, mah caan ah thlaraulei an herhmi kong tete kha zalong tein an i ruahceihṭi hna. Nangmah te lawng a ummi na si hmanh ah, mah caan ah Baibal kong pakhatkhat na hlathlainak thawng in Pathian na naih khawh.

Mah nih Jehovah he a kan naihter. “Pathian cu naih u law an naih ve hna lai.” (Jeim 4: 8) Jehovah a sining hna le a tuahsernak kong kha Baibal ah ṭha tein kan hlathlai tikah Pathian kong kha ṭha deuh in kan hngalh. Chungkhar pumhnak fawi tein thawk khawhnak lamkhat cu Baibal relṭinak in a si, Khrihfa Nunning le Rianṭuannak i zarhkhat ca Baibal relnak cazin ning zong in rel khawh a si. Chungkhar mi pakhat cio kha rel dingmi Baibal cang i phawt khawh a si, cun an relmi Baibal cang in zeidah an cawn khawh ti kha an zapi in an i ruah khawh.

Mah nih chungkhar he a kan naihter. Chungkhar ning in Baibal cawnnak nih nuleva, fale le nulepa kha an i pehtlaihnak a fehter. Chungkhar pumhnak cu nuam te le dai tein tuah awk a si i chungkhar dihlak nih an i ngaih awk a si. Nulepa nih fale kum ning in an i ruah dingmi kong kha thim khawh a si, Vennak Innsang le I Hlau! capar pakhatkhat chungin asiloah kan website, jw.org/cnh zong hman khawh a si. Sianginn ah fale tonmi harnak hna le zeitindah tawnghtham ding a si timi zong i ruah khawh a si. JW Broadcasting (tv.pr418.com) kha hmunkhat ah zohṭi in i ruahṭi khawh a si. Pumhnak ah sak dingmi hla zong cawn khawh a si, chungkhar pumhnak a dih hnuah pakhatkhat eiṭi khawh a si.

Jehovah biakṭi awkah zarh fate cutin caan nan pek tikah nan innchungkhar ning in Baibal cawnnak ah nan i nuam lai i Pathian nih nan i zuamnak ah thluachuah tampi aan pek hna lai.—Salm 1:1-3.

• Chungkhar pumhnak tuah awkah zeicah caan kan khiah?

• Chungkhar pumhnak ah innchungkhar dihlak in i nuamh khawh awkah nulepa nih zeidah an tuah khawh?