O ponda Israel Yehova ome̱le̱ ná mbia te̱ mu ko̱to̱me̱ o jokwa Bibe̱l. Nika e mongwane̱ o jouse̱ dube̱ labu la Loba, na ná mbia pe̱ mu bate jembame̱. (Ndimbisedi 6:6, 7) Nika nde Mboṅ a Yehova pe̱ i mabolano̱ ná buńa bō̱ ba woki te̱, mbia te̱ mu mako̱to̱me̱ o jokwa. Ba maja nde ka mako̱m o kwalea ońola betiledi bangame̱ne̱ ońola mbia mabu. To̱ e be̱ nde ná we mulamba o mboa ango̱, wená o no̱ngo̱ ponda o jokwa tem’a Bibe̱l po̱ o po̱sino̱.

“Buńa ba jowe̱ la mbia” bwe nde ponda o sisea be̱be̱ na Loba. “Sisea be̱be̱ na Loba, nde mo̱ pe̱ a masisea be̱be̱ na bińo̱.” (Yakobo 4:8) Di mabia nja ńe Yehova ye te̱ ná, o jokwa lasu la Bibe̱l di maso̱ bede̱mo bao. “Buńa ba jowe̱ la mbia,” je ná di langa Bibe̱l mbadi bato be̱se̱ beno̱ ná ba senga tongwea na bupe̱ mudango ma bolanga ba woki te̱ o ndongame̱n ńa Longe̱ la kriste̱n n’ebol’a dikalo. Elong’a mbia te̱ ye ná e langa ngus’a bepasi. Ombusa nika moto te̱ e ná a to̱pea ońola nje a so̱ṅtane̱no̱.

“Buńa ba jowe̱ la mbia” bwe nde ponda o lata belongi ba mbia. Mome na munj’ao, to̱so̱ bayedi na bana ba mako̱to̱me̱ te̱ o jokwa Bibe̱l, mulatako mabu mu mabata jembame̱. Ni ponda e mabe̱ nde ponda muńe̱nge̱ na musango ńena be̱se̱ ba menge̱le̱no̱ na ńo̱ngi. Bupisane̱ mbu ma bana babu, bayedi be ná ba po̱so̱ mato̱ti ma mokwa mena mongwane̱ elong’a mbia te̱. Be ná ba bolane̱ tema i busi o La Tour de Garde na Réveillez-vous! to̱so̱ yi ye o jw.org ńe o inte̱rne̱t. Be pe̱ ná ba kwalea ońola mikekisan bana ba makusano̱ o esukulu na ne̱ni beno̱ ná ba buka mo̱. Be pe̱ ná bombwa belēdi o JW television (tv.pr418.com), ombusa ponda ba kwaleya pe̱ ońol’ao. Be pe̱ ná ba lo̱ngo̱ myenge m’esese di mabolane̱no̱ o ndongame̱n. Mbia mō̱ pe̱ mi to̱ndi boṅsane̱ son a lambo la da to̱so̱ la ńo̱, ombusa jokwa.

Ni pond’a muńe̱nge̱ ńa tobotobo mbia mu matombise̱no̱ o jowe̱ Yehova, e mongwane̱ mbia mwe̱se̱ o to̱ndo̱ Eyal’a Loba. Loba pe̱ a si masuba namse̱ mi miwe̱n.​—Myenge 1:1-3.

• Ońola nje jangame̱ne̱no̱ te̱se̱ ponda ońola buńa ba jowe̱ la mbia e?

• Ne̱ni bayedi beno̱ ná ba bola ná bo buńa bo be̱ muńe̱nge̱ ońola mbia mwe̱se̱ e?