Toto ke eset, Jehovah esiyom ubon kiet kiet ẹsio ini ẹnịm man ẹdu ọtọkiet, ẹsọn̄ọ itie ufan mmọ ye enye, ẹnyụn̄ ẹtetịm ẹdiana kiet nte ubon. (Deuteronomy 6:6, 7) Ntak edi oro Mme Ntiense Jehovah ẹsisiode ini ẹnịm kpukpru urua man ubon mmọ ẹdiana kiet ẹtuak ibuot—ẹtie ifụre ifụre ẹneme mme n̄kpọ eke spirit oro ẹbehede ubon mmọ. Idem ọkpọkọm odụn̄ ikpọn̄, emekeme ndida ini emi nnyene nneme ye Abasi ke ndikpep Bible ke ibuotikọ ekededi oro afo emekde.

Edi ini nditetịm nsan̄a n̄kpere Jehovah. “Ẹsan̄a ẹkpere Abasi, ndien enye ayasan̄a ekpere mbufo.” (James 4:8) Nnyịn isitịm ifiọk Jehovah ke ini ikpepde nsio nsio n̄kpọ iban̄a mme edu ye mme edinam esie ke Ikọ esie, kpa Bible. Mmemmem usụn̄ nditọn̄ọ utuakibuot ubon mbufo edi ndida ndusụk ini ntie ọtọkiet n̄kot Bible uyo ọwọrọ. Ẹmekeme ndikot itie Bible emi ẹdikotde ke mbono esop Uwem ye Utom Nnyịn Mme Christian. Ẹmekeme ndibahade itie oro ẹdikotde ẹnọ owo kiet kiet ke ubon, ekem kpukpru owo ẹyeneme obufa n̄kpọ oro mmọ ẹkekpepde ke N̄wed Abasi.

Edi ini kpukpru owo ke ubon nditetịm ndiana kiet. Mme ebe ye ibanndọ, mme ete ye eka ye nditọ mmọ ẹsisọn̄ọ itie ebuana mmọ ke ini ẹkpepde Bible ọtọkiet nte ubon. Enye ekpenyene ndidi ini inemesịt ye emem, ye edinam oro kpukpru owo ẹtiede-tie ẹbet kpukpru urua. Mme ete ye eka ẹkeme ndimek mme ibuotikọ oro ẹnyenede ufọn ọnọ ubon mmọ etiene isua emana nditọ mmọ, ndusụk ẹdade n̄kpọ ẹto Enyọn̄-Ukpeme ye Ẹdemede! m̀mê ke ikpehe Intanet emi, jw.org/efi. Ẹmekeme ndineme mfịna oro nditọ mbufo ẹsobode ke ufọkn̄wed ye nte mmọ ẹkemede ndise mban̄a mfịna oro. Ẹmenyụn̄ ẹkeme nditie ntre nse TV nnyịn (tv.pr418.com/efi), ekem ẹneme se ẹkpepde. Mbufo ẹmekeme n̄ko ndikpep ikwọ oro ẹdikwọde ke mbono esop ẹnyụn̄ ẹdia mfefere udia ke utuakibuot ubon ama okokụre.

San̄asan̄a ini oro ẹdade ẹtuak ibuot ẹnọ Jehovah ọtọkiet mi kpukpru urua ayan̄wam kpukpru owo ke ubon ẹma Ikọ Abasi, ndien Abasi eyenen̄ede ọdiọn̄ ukeme oro mbufo ẹsịnde.—Psalm 1:1-3.

• Ntak emi isisiode ini inịm inọ utuakibuot ubon?

• Didie ke mme ete ye eka ẹkeme ndinam ini emi ẹnem kpukpru owo ke ubon?