Yɛ pələi wɔlɔ ə kɛ la, Zehova kaa bɔ pɛlɛn nua diɛ lowaiɠaa kɛ gee ɓa, ə gɛ da Zehova ni di wɔ nɛɛlaa hu ə kɛnɛ, ə lɛɛ pɛlɛn nua di wɔ yee lɔ gee hu ə wala-wala (Detelonɔmə 6:6, 7, TMN). Yili ɓə a gɛ Zehova ŋɔ Kəlaɠaa diɛ holo tɔnɔ həɠə ɉu lɔwɔ ɓa, diɛ Yálá ɓatoo di yəi bɛlɛn a naa ɲaanɛɛ. Mɛniɠaa pɛlɛn nua maakpaan gaa ma yɛ hwilɛn na da Zehova ni di wɔ nɛɛlaa lɛlɛ mɛni ɓa, ya ɓə da galan di yəi bɛlɛn. Ə ma kɛ yɛ́ tɔnɔ ə́ kaa ə́ yəi bɛlɛn, lowai tɛɛ Yálá pɔ a nawoo kalanŋaa. Mɛniɠaa Yálá lawoo a galan, ya dɔnɔ həɠə ɉu ə́ galan.

Zehova ɓatoo lowai kaa a lowai yii pɛlɛn nua da di maalɛɠɛ la ma. “ Ka ka maalɛɠɛ Yálá ɓa, Yálá a maalɛɠɛ kaa. ” (Zaakə 4:8). Gwa Zehova kɔlɔn a ɓɛlowai gwa kɛ dúwɔ́ pələɠaa da gɛ mɛniɠaa kɔlɔn ɉii la nawoo hɛɓɛ hu. Pɛlɛn nua di wɔ Yálá ɓatoo pələ ta ɓaa, diɛ Biblə ɓo a di woo kɛnɛ. Da pɛli yili kɛi yɛ pələi da kɛ Biblə ɓoi la laakpan ɉu tee kalan ma, lɔwɔ ɓa. Nu tɛi-tɛi a pɛli Biblə naa ta ɓoi. Yili pulu nu kəlee a pɛli nwoo hu kulɔi yɛ hwilɛn na yii di maakwɛli ma.

Gaa a lowai yii pɛlɛn nua da di maalɛɠɛ la di kee ɓa. Hulɔnu da nɛa, yɛ pələi lɔ nwɔnɔ lon gaa nua da di lonnii di kaa la, da kɛ di kee ɓa diɛ Biblə kalan, di wɔ yee lɔ gee hu a wala-wala. Maanɛɛ naalowai yɛ ɓo a kwəinɛɛ da liilaa hɔlɔɓoi lowai yii nu kəlee a kɛ maakpɔn ɉii lɔwɔ həli pələ tɛi-tɛi. Lon gaa nua da pɛli liɛwooɠaa kwɛlii ku wɔ kalan ɉɛɓɛɠaa hu, yii bɛliɛ di lonnii kaa kwəlanŋaa diɛ, ə lɛɛ da diɛni di galan gee ɓa. Yii di kaa galan ɉii a pɛli ə kɛ a mɛniɠaai da kɛ həlii di lonnii diɛ lakwəli taa. Ə gɛ di kpɔnmaa tɛɛ di lonnii pɔ mɛniɠaa tii kpɛɛ mɛni ɓa, da pɛli liɛwooɠaa hɔlɔɓoi La Tour de Garde da Réveillez-vous ! di hu, awala kɛtii ku wɔ kwɛli yɛlii jw.org ɓa. Nwələɠaa ka kaa pai di tooi ŋaakpɔn ma, ka pɛli ka ka maakwɛli diɛ. Galan gbɛɛ pulu, ka pɛli ka kɔnɔ mɛɛ gee ɓa, ə lɛɛ ka kpələ-kpələ hɛnŋaa kpələ.

Lowai tii ka kɛ ɉəɠəi ɉu lɔwɔ ɓa kaa kwɛli hwilɛn Zehova ɓa, a kwəinɛɛ tɛɛ ka pɔ Yálá lawoo kalanŋaa hu. Yálá kaa pai lúwɔ́ kɛi kaa yili maa mɛni ɓa. — Somə 1:1-3, TMN.

• Lə mɛni ɓa kwa lowai həɠə ɉu kuɔ Yálá ɓatoo ku yəi bɛlɛn ?

• Lon gaa nua da pɛli nowai tii ɲaanɛɛ ləi ?