Rẹ nin otọ ade, iho nọnsi Jehova nọn, nin azagba-uwa rebhe rẹ ha ri ẹghe ọbhi otọ rẹ ha sikoko mun urẹọbhọ nọnsele ziẹn. (Deuteronomy 6:6, 7) Ọnan zẹle nin Esali Jehova da ri ẹghe ọ bhi otọ bhi uzana rẹsi uzana rẹ do ikolo oga ọsi azagba-uwa. Ele ki fẹkẹ azilo bhi ebe hạ rẹkpa ele bhi urẹọbhọ nọnsele. Arẹmiẹn uwẹ ọkpa nọn, uwẹ dẹ yẹ sabọ zilọ nyan uhọnmhọn-ọta nọn yẹẹ ẹ bhi ẹkẹ iBaibo.

Ẹghe nanrẹ sikẹ Jehova nọn. ‘Sikẹ Osẹnobulua, ọle ki yẹ sikẹ ẹ.’ (James 4:8) IBaibo da rẹkpa mhan rẹ lẹn ọria nin Jehova khin bi ebi ọle rẹ lu emhin yẹ. Uwedẹ ọkpa nọn lẹkhẹ, nuwẹ arẹ ha lu ọnin oga azagba-uwa nan, ọle hi, nin bha ha muẹgbe bhi otọ rẹ tie iBaibo dagbare. Uwẹ sabọ rẹkhan emhanmhan nanrẹ tie iBaibo bhi Isikulu Oga. Asabọ gha ọnin ọdeọde ha tie nanlẹn, ọrebhe kuẹ ko zilo ọbhi ebi ele luẹ bhọ.

Ọrẹkpa Azagba-uwa rẹ ha mhọn ọkugbe. IBaibo nin azagba-uwa ko luẹ kugbe miẹn kpa okhuo bi ọdọ, aba bi inẹn ne mhọn imọn rẹ ha mhọn ọkugbe bhi iẹnlẹn. Ẹghe nin azagba-uwa re bhi otọ ne rẹ luẹ iBaibo ki ha yi ọsi eghọnghọn bi ọfure. Ọki ha yi ukpẹdẹ na ghọghọn khẹ bhi ẹkẹ uzana. Beji enin ibhokhan wanre sẹ, ene biọmọn arẹ lẹn ebe ha luẹ bhi ebe natiọle The Watchtower la Awake! la bhi websaiti nọnsẹ mhan natiọle jw.org. Bha sabọ zilo nyan ebi enin ibhokhan ha lu yẹ bhi edọnmhẹn nele miẹn bhi isikulu. Bha sabọ luẹ ilolo nan so bhi ikolo oga nọn vade. Bha ri ẹghe bhi otọ rẹ ha ri egbe ri ahoho sade bha do ọnin ikolo oga nan fo.

Ọnin ẹghe nan bhi oga ọsi Jehova rẹkpa azagba-uwa rẹ min ọnyẹmhẹn bhi iluẹmhin iBaibo. Jehova ki nan erọnmhọn ọbhọ.—Psalm 1:1-3.

• Bezẹle nin mhan da ri ẹghe ọbhi otọ rẹ do ikolo oga ọsi azagba-uwa?

• Be ọnin oga ọsi azagba-uwa arẹ ha yi ọsi eghọnghọn yẹ?