Jehovaka, nuatka áiniana nuka ni nuarijiai tura uchirijiai winia enentáimturainiak iruntrar warasár nankaámasarat tusa tuke wakériniaiti (Ipisiunam [Efesios] 6:4). Tuma asamtai, Testigos de Jehová áiniana nuka tuke atsakámutin chikichík tsawantin ankantan sumamsar, ni nuarijiai tura uchirijiai Yuusa chichamen unuimiatin áiniawai. Nuna túruiniak, Yuusnan nekaawar ti shiir anenain áiniawai. Tui unuimiatin ainia? Jeansha, aansha pujusárkesha unuimiatin áiniawai. Tura aintsank, niinki pujú áiniaksha Yuús Papiín paant nekaamij tusar unuimiatin áiniawai.

Jehová amikrí ajástasar. Yuusa amikrí ajastaj takurkia umírkatniuitji. Nu túrakrikia ni amikrí ajástatji (Sántiak 4:8). Jehová shiir iniákmamtairi, yaunchuk túramusha, ni chichame unuimiatrar paant nekaáttaji. Ame nuármijiai nuyá uchírmijiai Yuusna unuimiátrattsam yúpichuch ati takumka, Irúntramunam unuimiattai papií - Jesús itiurmia núnisrik túrawartai tana nui Yuús Papií áujsatin ana nu kakarum áujsamniaitrume. Túrarum, warí nekaarum nu áujmattsamniaitrume.

Ti shiir anénaittsar. Nuátkaruka ni nuarijiai Yuús Papiín unuimiátainiakka ti anénaiyartatui. Tura aintsank, uchirtin áiniasha ni uchirijiai Yuús Papiín unuimiátainiakka ti anénaisartatui. Yuús Papií unuímiatmanum wará warát kajernaitsuk nankaámainiakka chikich tsawántincha unuimiártasar wakériartatui. Uchirtin áiniaka internetnum jw.org tana nui enkemawar, uchiniun áujmatun jusar, uchirijiai unuimiátrarminiaiti. Nuyá Étserma papií [La Atalaya] tura Ánermak pujustá [¡Despertad!] tana nuniancha unuimiátrarminiaiti. Tura aintsank, escuelanam nuyá colégionmansha itiurchat wainkiar itiúr iwiáramniait nunasha unuimiátainiak áujmattsarminiaiti. Túrutskesha internetnum tv.pr418.com (JW Broadcasting) tana nui, tuke nantutín videos najánamu jínniuana nuna iisár, nuarijiai tura uchirijiai áujmattsarminiaiti. Irúntramunam nampéstinniaksha unuimiátrarminiaiti, tura amukár warinkish yuáwarminiaiti.

Nuátkatirmeka atumí nuarijiai, atumí uchiríjiaisha, tuke atsakámutin Yuusa chichame unuímiatkuram, unuimiaajat nekáptiattrume, tura Jehovasha yainmáktatrume (Apukarípsis 1:3).

• Urúkamtai nuátkaruka ni nuarijiai tura uchirijiai tuke atsakámutin ankantan sumamsar Yuús Papiín unuimiátrartiniait?

• Uchírtinkia Yuusa chichamen unuimiátainiak, uchirí wará warat nankaámasarat tusar warijiai unuimiárarminiait?