Tá si̱náʼa̱ ndiva̱ʼa, si̱jaá kúni̱ va Jeová Ndio̱s ña̱ miíyó xíʼín na̱ veʼe yó ná tavá yó tiempo nátaka yó ndatu̱ʼun yó xíʼín ná, ña̱yóʼo chíndeéán iin ta iin yó já kaneʼe táʼan va̱ʼa yo̱ (Deuteronomio 6:6, 7). Saʼa̱ ña̱yóʼo, na̱ testigo Jeová semana ta semana tavá ná tiempo já kandañu̱ʼu ná Jeová Ndio̱s, ta vií ta núchí ndatu̱ʼun ná saʼa̱ iin iin ña̱ ndoʼo na, ta ndéʼé ná ndixi kuu kee na já kandoyi va̱ʼa ka̱ ví ná. Ta va̱árá iin túʼún miíní ió kuu jákuáʼa ní saʼa̱ ña̱ káʼa̱n Tu̱ʼun Ndio̱s, jaá kuu kachúun ní tiempo ní.

Viti kúú tiempo ña̱ kuu kuyati yo̱ nuu̱ Jeová Ndio̱s. “Kayati ndó nuu̱ Ndióxi̱ ta jaá kayati Ndióxi̱ nuu̱ ndo̱.” (Santiago 4:8.) Ta jákuáʼa yó saʼa̱ ndixi kúú Ndio̱s nuu̱ Tu̱ʼun si ña̱yóʼo chíndeéán miíyó já kandaa̱ va̱ʼa ini yó ndixi kúú si. Iin ña̱ kuu kee ní já kásáʼá ní jákuáʼa ní xíʼín na veʼe ní kía̱n kuu kaʼvi ní Tu̱ʼun Ndio̱s, kuu kaʼvi ní ña kani jákuáʼa yó iin iin semana ña naní, Escuela nuu̱ jákuáʼa nduʼu̱ ndixi kuu Jánaʼa̱ ndu̱ saʼa̱ Tu̱ʼun Ndio̱s. Ta tá iin ta iin ndó kuu kaʼvi ndó iin taʼnda̱ ña̱ va̱si nuu̱ Tu̱ʼun Ndio̱s, ta ni ndiʼi já ndiʼi ndó kuu káʼa̱n ndó ndákía̱n ni̱ kati̱ʼa ndó.

Víti kúú tiempo ña̱ nátaka yó xíʼín na̱ veʼe yó. Na̱ kúú yi̱í xíʼín na̱ kúú ñajiʼí, tá jaá ni na̱ kúú tatá xíʼín na̱ kúú naná xíʼín na̱ kúú de̱ʼe tá jákuáʼa ná Tu̱ʼun Ndio̱s já chíndeéán ná néʼe táʼan va̱ʼa na. Kanian kukuuan iin ña̱ kúni̱ yó nátaka yó jáchi̱ ña̱yóʼo keean ña̱ ná kujii̱ ini yó, tá kánian kúni̱ yo̱ ña̱ ná saa̱ kivi̱ yóʼo. Na̱ kúú tatá xíʼín na̱ kúú naná, á si̱va̱ʼa de̱ʼe na á va̱lí na, tá kúni̱ na̱ kuu jákuáʼa na̱ ña̱ va̱si nuu̱ tutu La Atalaya xíʼín ¡Despertad!, á nuu̱ página Internet ña kumi̱ ndu̱ jw.org/jw-mxo kuu jákuáʼa ní xíʼín ná ndixi kuu kee na tá ná yáʼa na tu̱ndóʼó veʼe escuela. Tá jaá ni kuu kata ní yaa ña xita yo̱ tá ná nátaka yó, ta jaá ni ta ni̱ ndiʼi kuu koo iin ña̱ nakovíxi̱ yó.

Tiempo ña̱ nátaka yó kandañu̱ʼu yo̱ Jeová Ndio̱s xíʼín na̱ veʼe yó chíndeéán miíyó jáchi̱ jaá kutoó ná jákuáʼa ná saʼa̱ Tu̱ʼun Ndio̱s, ta miísí ka̱mañi sí miíyó saʼa̱ ña̱ ndukundeé yó kee yó ña̱yóʼo (Salmo 1:1-3).

• ¿Ndiva̱ʼa miíyó xíʼín na̱ veʼe yó tavá yó tiempo já kandañu̱ʼu yo̱ Jeová Ndio̱s?

• ¿Ndixi kuu kee na̱ kúú tatá xíʼín na̱ kúú naná ña̱ ndiʼi na̱ veʼe na kutoó ná nátaka ná kandañu̱ʼu ná Jeová Ndio̱s?