Si leqdim n zzman, Yahwa yebɣa-​yasen i iεeggalen n tawacult ad sεeddayen lweqt jmiε akken ad sseǧhden lεalaqat-​nsen ama yid-​es ama gar-​asen. (Asmekti 6:6, 7) Γef wayagi i εezzlen iεeggalen n yal tawacult n Inagan n Yahwa cwiṭ n lweqt di smana bac ad εebden Yahwa lwaḥid. Di teswiεin am tigi, ţqeṣṣiren ɣef temsal icudden ɣer leḥwayeǧ n ṛṛuḥ εlaḥsab n lmeḥwiǧat-​nsen; xeddmen ayagi di talwit d ṛṛaḥa. Γas teţεiceḍ weḥd-​ek, tzemreḍ aţ-​ţefkeḍ si lweqt-​ik i Ṛebbi, m’ara teɣreḍ albeεḍ n temsal i k-​iεeǧben ireṣṣan ɣef Wedlis Iqedsen.

Ţ-​ţaswiεt ideg ara tqerrbeḍ ɣer Yahwa. “Qerrbet ɣer Yillu, a d-​iqerreb ɣur-​wen.” (Yeεqub 4:8) Nessawaḍ a nissin akteṛ Yahwa m’ara nlemmed deg Wawal-​is, Adlis Iqedsen, amek yeţxemmim, ayen yeţḥussu d wayen i gxeddem. Bac a nebdu a nxeddem leεbada n twacult, nezmer xerṣum a neqqar Adlis Iqedsen jmiε s ṣṣut εlayen. Nezmer di lemtel a nɣer aḥric i ɣ-​d-​iţţunefken di smana deg wahil n unejmuε n Temεict tamasiḥit d leqdic. Mkul aεeggal n twacult a d-​iɣer cwiyya seg-​s, mbeεd, zemren akken ma llan a d-​inin ayen i d-​fehmen.

Ţ-​ţaswiεt ideg ara tqerrbeḍ ɣer twacult-​ik. Argaz ţ-​ţmeṭṭut-​is, neɣ imawlan d warraw-​nsen, zemren ad sseǧhden lεalaqat-​nsen m’ara qqaren Adlis Iqedsen lwaḥid. Ilaq aţ-​ţili ţ-​ţaswiεt n lfeṛḥ akk-​d talwit, ara ţṛaǧun meṛṛa s lḥir. Imawlan ţţextiṛin-​d timsal iɣef ara hedṛen, tid ara iṣelḥen i warraw-​nsen εlaḥsab n leεmeṛ-​nsen. Yezmer ad yili ahat d kra n weɣbel i d-​mmugren di llakul d wamek ara t-​frun. Ssexdamen di lemtel ayen iɣef i d-​yehdeṛ Lbeṛǧ n Tεessast neɣ Aki-​d!, neɣ asmel-​nneɣ Internet, jw.org. Tikwal daɣen, ţfeṛṛiǧen kra di JW Tilibizyu s Internet (tv.pr418.com), mbeεd heddṛen fell-​as wway-​gar-​asen. Kra ḥemmlen ad ɣennin ccnawi bac a ten-​heggin i inejmuεen, yerna yeţţeεǧab-​asen lḥal ad ččen neɣ ad swen lḥaǧa m’ara fakken leεbada n twacult.

Taswiεt-​agi yelhan, ideg i teţţeεbad twacult Yahwa mkul smana, a ţ-​tεiwen akken a s-​teεǧeb tɣuri n Wedlis Iqedsen. Mebla ccekk, Ṛebbi ad ibarek lmeǧhudat i txeddmeḍ.—Ahellil 1:1-3.

• Ayɣer i glaq a d-​tεezleḍ lweqt i leεbada n twacult?

• Amek i zemren imawlan ad rren taswiεt-​a ţ-​ţaswiεt ara iεeǧben i twacult kamel?