Tuka kuna nz’ankulu, Yave wavavanga vo esi nzo bavaulanga e ntangwa ya kala vamosi muna kumika e kimwanda kiau yo siamisa e ngwizani au muna nzo. (Nsiku 6:6, 7) Ekiaki i kuma Mbangi za Yave bevaulwilanga e ntangwa konso lumingu mu kalanga ye nsambila ya esi nzo. Belongokanga yo badika mambu mena e betela ye nsatu zau za mwanda. Kana nkutu vo u mpumpa, olenda baka e nluta mu vaulanga e ntangwa ya kala y’elongi dia Nkand’a Nzambi.

I ntangwa ya finama Yave. “Nufinama Nzambi, oyandi mpe okunufinama.” ( Yakobo 4:8) Tutoma zayanga Yave vava tulongokanga o mavangu ye kiwuntu kiandi muna Nkand’a Nzambi. Imosi muna mpila yambote tulenda yantikila e nsambila ya esi nzo, i vaula e ntangwa mu tanga o Nkand’a Nzambi kumosi mu nding’angolo. Tulenda sadila e programa ya ntangilu a kapu ya Nkand’a Nzambi ifimpwanga konso lumingu muna lukutakanu Zingu ye Salu Kieto kia Kikristu. Konso muntu muna nzo olenda vewa e sono ketanga, i bosi awonso balenda vova e diambu diampa balongokele muna Sono batangidi.

I ntangwa ya finama muntu yo nkwandi muna nzo. Akala ye akento, mase yo wana besiamisanga e ngwizani au vava belongokanga kumosi o Nkand’a Nzambi. Ifwete kala se ntangwa ya kiese yo luvuvamu ina konso muntu muna nzo kelongoka diambu diamfunu muna lumingu lwaluna. Mun’owu wa mvu mia wan’au, mase balenda sola e ntu a diambu wamfunu una bevovela, anga balenda sadila malongi mevaikiswanga mun’Eyingidilu ye Despertai! yovo muna nzil’eto ya internete jw.org/kwy. Nulenda vovela mambu bewanananga mau o wan’eno kuna sikola ye una balenda mo sundila. Nga nulenda tala programa mosi muna televizau JW Broadcasting (tv.pr418.com) yo vovela mana nulongokele? Nulenda mpe yimbila e nkunga miyimbilwa muna tukutakanu yo dia kuna mfoko a nsambila ya esi nzo.

E ntangwa nuvaulanga konso lumingu muna sambila Yave kumosi, isadisa konso muntu muna nzo mu yangalela longoka e Diambu dia Nzambi. O Yave osambula kikilu e ngolo nuvanga mu diambu diadi.—Nkunga 1:1-3.

• Ekuma tuvaulwilanga e ntangwa mu kala ye nsambila ya esi nzo?

• Amase aweyi balenda kitulwila e ntangwa yayi se ntangwa kiese kwa esi nzo awonso?