Kuswabo kalekale, Yehova ulisuni ayi mukwashi uli woonse unooba aciindi cakucita shintu sheenga shayumya bushicibusa bwabo anguwe alimwi sheenga shabacafwa kuba bacatene. (Dutolonomi 6:6, 7) Ngomulandu Bakamboni Bakwe Yehova balicite bushiku bomwi nsondo ili yoonse ndyebacita kulambila kwamukwashi—kubandikishanya makani ashakumushimu kwaamba ayi bayumye bushicibusa bwabo. Na mulakala nweenka, inga mwasebensesha ciindi ici kwiiya makani amuBaibo eenga ayumya bushicibusa bwanu aLesa.

Nciindi cakuyumya bushicibusa aYehova. “Kamusena pafwaafwi aLesa alakwe ulaakusena pafwaafwi amwebo.” (Jemusi 4:8) Inga twamushiba kabotu Yehova na tweeya shiinji pali nguwe kwiinda muMaswi akwe. Nshila yuubu kutalika kulambila kwamukwashi nkubelenga Baibo pomwi mbuli mukwashi, na kamusuni inga mwasebensesha mulongo wa kubelenga Baibo kwa nsondo ansondo kwa mabungano a Buumi Anciito. Inga mwaabana mbasu shakubelenga muntu womwi awomwi mumukwashi, mwamana kubelenga inga mwabandika nshomweeyawo.

Nciindi cakuyumya bushicibusa bwanu mumukwashi. Basankwa a bakaabo, bashali alimwi abaana, inga bayumya bushicibusa bwabo na kabeeya Baibo pomwi mbuli mukwashi. Cilyeelete kuba ciindi cisangalasha, caluumuno alimwi ciindi uli woonse mumukwashi ncalangila. Bashali inga basala shiiyo nsheenga basebensesha kweelana ashiimo sha bana babo, cimwi ciindi inga basebensesha makani kuswa mu Ngazi Yamulindizi alimwi a Sinsimuka! nabi makani amwi kuswa pa jw.org. Inga mwabandika lipenshi bana banu ndyobacana kucikolo akubacafwa mbweenga bacita. Inga mweebela pulogilamu yatondeshekwa pa JW Broadcasting (tv.pr418.com) alimwi inga mwasangalala kwiinduluka munyimbo sha Bwaami sheeshi shikeembwe kumabubgano ansondo iyo alimwi pesule mulakonsha kusangalala ashakulya shili shoonse nsheenga mwabamba.

Kuba aciindi cilibetele ici cakulambila Yehova mumukwashi nsondo ansondo, cilaakucafwa mukwashi wanu kusangalala kwiiya Maswi akwe Lesa, alimwi akuleta shoolwe shiinji mubuumi bwanu.—Kulumbaisha 1:1-3.

• Ino ngumulandunshi tulacita kulambila kwamukwashi?

• Ino bashali inga bacita buyani kwaamba ayi boonse banoosangalala akulambila kwamukwashi?