Okuva edda n’edda Yakuwa ayagala ab’omu maka okubeerako awamu basobole okwenyweza mu by’omwoyo era n’okunyweza enkolagana eriwo wakati waabwe. (Ekyamateeka 6:6, 7) Eyo ye nsonga lwaki Abajulirwa ba Yakuwa baba n’ekiseera eky’okusinziza awamu ng’amaka buli wiiki. Ekiseera ekyo bakikozesa okukubaganya ebirowoozo ku nsonga ezibakwatako ng’amaka nga bakozesa Bayibuli. Ne bwe kiba nti obeera wekka, osobola okukozesa ekiseera ekyo okunyweza enkolagana yo ne Katonda nga weesomesa Bayibuli mu ngeri yonna gy’oba osazeewo.

Kiba kiseera kya kusemberera Yakuwa. “Musemberere Katonda naye anaabasemberera.” ( Yakobo 4:8) Bwe tusoma Bayibuli tweyongera okumanya Yakuwa ne tutegeera bulungi engeri ze era n’ebyo bye yakola. Engeri ennyangu ey’okutandikamu okusinza kw’amaka kwe kusomera awamu Bayibuli, oboolyawo nga mugoberera enteekateeka eya buli wiiki egobererwa mu Lukuŋŋaana lw’Obulamu bw’Ekikristaayo. Buli omu ayinza okuweebwa ekitundu ky’anaasoma mu Bayibuli ng’abalala bawuliriza, era oluvannyuma ne mukubaganya ebirowoozo ku ebyo bye muba muyize.

Kiba kiseera ab’omu maka okunyweza enkolagana eriwo wakati waabwe. Ab’omu maka bwe basomera awamu Bayibuli, abaami ne bakyala baabwe banyweza enkolagana eriwo wakati waabwe, era n’abazadde banyweza enkolagana eriwo wakati waabwe n’abaana baabwe. Ekiseera ekyo kisaanidde kuba kya ssanyu, kya mirembe, era nga buli omu akyesunga. Abazadde musobola okusalawo biki ebinaakubaganyizibwako ebirowoozo nga musinziira ku myaka gy’abaana bammwe. Oboolyawo muyinza okukozesa ebitundu ebimu ebifulumira mu Omunaala gw’Omukuumi, Zuukuka!, ne ku mukutu gwaffe jw.org/lg. Musobola okwogera ku kizibu abaana bammwe kye boolekagana nakyo ku ssomero era n’engeri gye basobola okukyaŋŋangamu. Muyinza okulaba ekimu ku biri ku ttivi ya JW Broadcasting (tv.pr418.com/lg), oluvannyuma ne mukikubaganyaako ebirowoozo. Musobola n’okwegezaamu mu nnyimba ezinaayimbibwa mu nkuŋŋaana era oluvannyuma ne mubaako n’obuntu obutonotono bwe mulya oba bwe munywa.

Ekiseera amaka kye gamala buli wiiki nga gasinza Yakuwa kiyamba buli omu mu maka okwagala ennyo okusoma Ekigambo kya Katonda, era Yakuwa ajja kubawa emikisa mingi bwe munaafuba okumusinziza awamu ng’amaka.​—Zabbuli 1:1-3.

• Lwaki tuba n’ekiseera eky’okusinza Yakuwa ng’amaka?

• Abazadde bayinza batya okufuula okusinza kw’amaka okunyuvu?