E’dozu drio, Yehova le ’ba aku alu alu ma alea ’diyi ma okuki eyi tualu ecozu agyi eyini ibe azini eyi ma eselea ri sizu okporu. (Azita Amvizu 6:6, 7) ’Dari bani asisile ’Ba Yehova ma E’yo Eti Nzepi ’Diyi pini ondre azini pezu alu sabatu driasi Mungu inzizu akua tualu ri. Eyi e’yo orindisi le ma ngaki azi drinia riki oni eyi ma eselea. Mi ka tro o’a a’dule, sawa ’da ma alea mi eco mi esi Mungu vu enyia mini e’yo onizu eri ma dria Biblia ma alea risi.

’Diri sawa esizoru enyia Yehova vu ri. “Emi ma esi emi ogogo Mungu vu, Munguni nga ani i esi emi vu ogogo.” (Yakobo 4:8) Ama e’yo dria Yehova ma dria ’diyi oni amani eri ma adriza azini ’yeta ki onizu kilili E’yo erini Biblia ma aleasi risi. Geri azi alu ewakoko mini ondre Mungu inzizu akua ri e’dozu ri emini Biblia lazu tualu o’duko urusi risi. Emi eco e’yo ’bani oti lazaru sabiti alu alu ni Okuta Idri Azini E’yo Oluza Niri ma alea ri la i ra. Biblia ma woko emini la ri ’ba eco awa ’ba dria ni lazu, vutinia ’ba alu alu ni di e’yo orodriru erini oni ri ece.

’Diri sawa ’ba akua ’diyi ni eyi esizoru tualu ri. Leta agupi pi ma eselea oku be, kaniku tipika pi ma eselea anzi pie ri nga zo okporu kaki Biblia oni tualu ria. Le o’du ’di ma ovu onyiru azini ayikosi ndepi ni sabatu ’da ma alea ’ba dria ni le ece ku ri. Anzi nyiri eyini ’diyi ma eli vusi, tipika ki e’yo orodriru anzi ni ri pe engazu Watchtower azini Awake! kaniku ama webusaiti, jw.org ma alea ’ba dria ni eyi ma egata ecezu drinia. Mi eco e’yo ewaru anzi nyiri mini ’diyi ni isu sukulua ’diyi oni geri tini tazu ’diyi pie. Emi eco programu azi JW Broadcasting (tv.pr418.com) ma alea ni ne ra, vutinia emi e’yo nze imbata emini isu alenia ri ma dria.

Sawa ndu ’bani pe sabatu driasi ’ba akua ’diyi ni Yehova ni inzizu ’diri ’ba dria akua ’diyi ni ecozu ayiko isuzu E’yo Munguni ri ma alea tusu coza be ri.—Zaburi 1:1-3.

• Ama sawa pe sabatu driasi Mungu inzizu akua a’du ma e’yo si ya?

• Tipika ecoki o’du ’diri ’ba onyiru ’ba dria akua ’diyi ni ngoni ru?