ບົດທີ 10
ການນະມັດສະການປະຈຳຄອບຄົວແມ່ນຫຍັງ?
ເກົາຫຼີໃຕ້
ເບຣຊີນ
ອົດສະຕຣາລີ
ກີເນ
ນັບຕັ້ງແຕ່ສະໄໝບູຮານ ພະເຢໂຫວາຕ້ອງການໃຫ້ແຕ່ລະຄອບຄົວໃຊ້ເວລານຳກັນເພື່ອເສີມສ້າງຄວາມເຊື່ອຂອງເຂົາເຈົ້າໃຫ້ເຂັ້ມແຂງ ແລະເພື່ອໃຫ້ຄອບຄົວແໜ້ນແຟ້ນ. (ພະບັນຍັດ 6:6, 7) ດ້ວຍເຫດນັ້ນພະຍານພະເຢໂຫວາຈຶ່ງຈັດເວລາໄວ້ໃນແຕ່ລະອາທິດເພື່ອຄອບຄົວຈະນະມັດສະການຮ່ວມກັນ ເຊິ່ງເປັນການພິຈາລະນາເລື່ອງຕ່າງ ໆ ທາງດ້ານຄວາມເຊື່ອທີ່ເໝາະກັບຄວາມຈຳເປັນຂອງເຂົາເຈົ້າໃນບັນຍາກາດທີ່ຜ່ອນຄາຍ. ເຖິງແມ່ນວ່າທ່ານຢູ່ຄົນດຽວ ການເຮັດເຊັ່ນນັ້ນຖືເປັນການໃຊ້ເວລາທີ່ຄຸ້ມຄ່າກັບພະເຈົ້າໃນການສຶກສາຄຳພີໄບເບິນໃນຫົວຂໍ້ທີ່ເລືອກເອົາເອງ.
ເປັນເວລາທີ່ຈະເຂົ້າໃກ້ຊິດພະເຢໂຫວາໃຫ້ຫຼາຍຂຶ້ນ. “ຈົ່ງຫຍັບເຂົ້າມາໃກ້ພະເຈົ້າແລະພະອົງຈະຫຍັບເຂົ້າມາໃກ້ທ່ານທັງຫຼາຍ.” (ຢາໂກໂບ 4:8) ເຮົາຮູ້ຈັກພະເຢໂຫວາດີຂຶ້ນເມື່ອເຮົາຮຽນຮູ້ລາຍລະອຽດຕ່າງ ໆ ກ່ຽວກັບຄຸນລັກສະນະແລະການກະທຳຕ່າງ ໆ ຂອງພະອົງໂດຍທາງຖ້ອຍຄຳຂອງພະອົງທີ່ມີການບັນທຶກໄວ້. ວິທີງ່າຍ ໆ ທີ່ຈະເລີ່ມຕົ້ນການນະມັດສະການປະຈຳຄອບຄົວແມ່ນການໃຊ້ເວລາອ່ານຄຳພີໄບເບິນນຳກັນດ້ວຍການອ່ານອອກສຽງ ບາງທີໂດຍຕິດຕາມຕາລະລາງການອ່ານປະຈຳອາທິດສຳລັບການປະຊຸມຊີວິດແລະວຽກຮັບໃຊ້. ອາດມອບໝາຍໃຫ້ສະມາຊິກແຕ່ລະຄົນໃນຄອບຄົວອ່ານບາງສ່ວນ ແລະຈາກນັ້ນໃຫ້ທຸກຄົນເວົ້າເຖິງຈຸດທີ່ໄດ້ຈາກພະຄຳພີ.
ເປັນເວລາທີ່ສະມາຊິກຄອບຄົວຈະເຂົ້າໃກ້ຊິດກັນໃຫ້ຫຼາຍຂຶ້ນ. ຜົວແລະເມຍ ລວມທັງພໍ່ແມ່ແລະລູກເສີມສ້າງສາຍສຳພັນຕໍ່ກັນແລະກັນເມື່ອສຶກສາຄຳພີໄບເບິນແບບເປັນຄອບຄົວ. ນັ້ນຄວນເປັນເວລາທີ່ສະຫງົບ ມ່ວນຊື່ນ ແລະເປັນສິ່ງທີ່ທຸກຄົນໃນຄອບຄົວລໍຄອຍໃນແຕ່ລະອາທິດ. ຂຶ້ນກັບອາຍຸຂອງລູກ ພໍ່ແມ່ສາມາດເລືອກເອົາຫົວຂໍ້ທີ່ນຳໄປປະຕິບັດໄດ້ແທ້ມາພິຈາລະນາ ບາງທີໂດຍໃຊ້ບົດຄວາມພິເສດຈາກຫໍສັງເກດການ ແລະຕື່ນເຖີດ! ຫຼືຈາກເວັບໄຊຂອງເຮົາ jw.org. ທ່ານສາມາດເວົ້າກ່ຽວກັບບັນຫາໃດໜຶ່ງທີ່ລູກປະເຊີນຢູ່ໂຮງຮຽນ ແລະວິທີຮັບມືກັບບັນຫານັ້ນ. ທ່ານສາມາດເບິ່ງລາຍການໂທລະທັດຂອງ JW ແລະລົມກັນກ່ຽວກັບສິ່ງທີ່ໄດ້ເບິ່ງ. ທ່ານອາດມ່ວນຊື່ນກັບການຝຶກຊ້ອມຮ້ອງເພງທີ່ຈະຮ້ອງຢູ່ການປະຊຸມ ແລະກິນອາຫານວ່າງນຳກັນພາຍຫຼັງການນະມັດສະການປະຈຳຄອບຄົວ.
ເວລາພິເສດແບບນີ້ທີ່ໃຊ້ໃນແຕ່ລະອາທິດເພື່ອນະມັດສະການພະເຢໂຫວານຳກັນຈະຊ່ວຍທຸກຄົນໃນຄອບຄົວໃຫ້ພົບກັບຄວາມຍິນດີໃນການຮຽນຮູ້ກ່ຽວກັບຄຳພີໄບເບິນ ແລະພະອົງຈະອວຍພອນຢ່າງລົ້ນເຫຼືອໃນຄວາມພະຍາຍາມຂອງທ່ານ.—ຄຳເພງ 1:1-3
-
ເປັນຫຍັງເຮົາຈຶ່ງຈັດເວລາໄວ້ສຳລັບການນະມັດສະການປະຈຳຄອບຄົວ?
-
ພໍ່ແມ່ຈະເຮັດແນວໃດເພື່ອໃຫ້ໂອກາດນີ້ເປັນຕາໜ້າເພີດເພີນສຳລັບທຸກຄົນໃນຄອບຄົວ?
