Idaunega amo ema bona hari, Iehova na e uramu ruma bese ese ḡau haida bae kara hebou, unu amo edia hetura karana Dirava ida bona ruma taudia ida bae namo. (Deuteronomi 6:6, 7) Una dainai, Iehova ena Witnes taudia edia ruma bese ta ta na wiki lalonai nega ta e makaiamu, ruma bese Baibel stadi totona. Una neganai, ruma bese na mai moaledia ida Dirava bae hetura henia daladia e herevalaimu. Ena be sibomu o nohomu, to oi danu wiki lalonai nega ta ba makaia diba, o ura heniamu Baibel topik ta ba stadilaia.

Iehova a dibaia namonamomu. “Dirava ba raka henia kahi, bena ia ese danu baine raka henimu kahi.” (Iakobo 4:8) Baibel istadilaina karana amo, Iehova ena kara a dibadia namonamomu. Emu ruma bese Baibel stadi ba hamatamaia dalana ta na ina: Baibel ba duahia hebou, reana Tiokratik Haroro Sikuli ena sediual ba badinaia. Heḡereḡere ruma taudia ta ta ese Baibel siridia bae duahi, bena unu siri amo e dibamu ḡaudia bae herevalai.

Ruma taudia ida a hebamomu negana. Ruma bese Baibel stadi ese headava taudia eiava tama sina bona natu edia hetura karana e hanamoamu. Namona na iboudiai ese una stadi negana bae moalelaia bona bae laloa bada. Natu edia mauri laḡani na idau-idau dainai, tama sina ese Baibel topik maorodia bae abi hidi na namo, reana Gima Kohorona, Awake! o emai Web sait, jw.org amo bae abi. Reana natu ese sikuli ai e davarimu hekwakwanaina ta bona ihanaina dalana ba herevalai. Bona ruma bese Baibel stadi murinai, kongrigisen heboudiai bo abimu anedia ba toho eiava bavaniani hebou.

Wiki ta ta iboudiai, ruma bese taudia ese Iehova be toma henia dihomu neganai, iboudiai na Dirava ena Hereva be moalelaiamu, bona Iehova ese be hanamoadiamu.—Salamo 1:1-3.

• Dahaka dainai wiki lalonai nega ta a makaiamu, ruma bese Baibel stadi totona

• Iboudiai ese ruma bese Baibel stadi bae moalelaia totona, tama sina be dahaka bae kara?