Ukufuma na kaali nye, e Yehova akalonda awa mu lupwa wawa ponga pa kuti wawomya wuciwuza wawo na weliwe. (Amasundo 6:6, 7) Awuno umulandu wuno Inte zya kwe Yehova wakasolela uwanda wonga mwe sabata pa kuti wasambilila ivya kwe Leza ni ndupwa zyawo. Wakalanzyanya pe vino vikumile ulupwa lyo watesile ni myezo. Nanti mwikala mwenganye mungasolapo ukuwomvya yo-o impindi ukusokota na vinji pi lyasi lya mu Baibolo lino lingawomya wuciwuza winu nu Leza.

Amapepo ya lupwa yakatupalamika kwe Yehova. E Baibolo ikati: “Palamilani kwe Leza nawe alipalamila kwe mwemwe.” (Jemusi 4:8) Nga cakuti tukuyisambilizya sana Baibolo tukamanya sana vino Yehova wawa, swinya tukamanya na vino akacita. Icintu cimwi icipepuke cino mungacita, akuwazizya Baibolo ponga nu lupwa lwinu, ndi mukulonda mungakonka ukuwazya Baibolo ukwe cila sabata kuno kukawa mu kalibuku ka Imikaliile ya Wina Klistu nu Mulimo Wuno Tukawomba. Mungankanya cila muntu mu lupwa ukwiza wazyako uluwali mwe Baibolo, ndi mwamala ukuwazya mungaleka wonsinye walandepo vino wasambilizileko.

Amapepo ya lupwa yakalemenkanya awa mu lupwa. Umulume nu muci, awakwasi na wana wakalemenkana sana nga cakuti wakusambilila Baibolo ponga. Pa mapepo ya lupwa pafwile ukuwa icimwemwe nu mutende, swinya wonsinye mu lupwa wafwile wavwambisya sana ukuti wo-o uwanda wufike zuwa. Awakwasi wangasolapo amalyasi ya kwizalanzyanya pa mapepo ya lupwa ukulingana ni cimo ca wana wawo. Wangawomvya amalyasi yano yakazanwa mu Ulupungu lwa kwa Kalinda nu Loleni! nanti yano yakazanwa pa webusaiti yitu iya jw.org. Awakwasi wangalanzyanya na wana wawo pa ntazi zino wakusunkanya ku sukulu na vino wangacita pa ntazi zino wakupitamo. Mungatambako ne programu ya pa mulawasa wa JW Broadicasting nu kulanzyanya vino mwasambililako. Limwi mungimbilako vye indwimbo zino muliyimbila pa kulongana kuno kukonsilepo swinya amapepo ya lupwa ndi yasila mungalyako nu twakulya tuno mupekinye.

Nga cakuti lyonsinye mukuwa na mapepo ya lupwa pe wo-o uwanda uwuyiwele, awa mu lupwa lwinu waliwayitopwa sana ukusambilila Izwi lya kwe Leza, swinya e Yehova aliwamilambula pa kuwombesya kwinu.—Amalumbo 1:1-3

• Amulandu ci wuno tukakwatila uwanda wa mapepo ya lupwa?

• Uzye awakwasi wangacita wuli pa kuti uwanda wa mapepo ya lupwa walenga wonsinye wasansamuka?