Kej uejkajkia uan ipan ni tonali, Jehová kineki ma itstokaj sansejko tetajmej uan ininkoneuaj. Nopa kichiuas kuali ma mouikakaj inijuantij uan iuaya toTeotsij (Deuteronomio 6:6, 7). Yeka Jehová itlajtoltemakauaj kikauaj se kentsi tonali sejse chikueyi uan kiueyichiuaj toTeotsij kema momachtiaj ika ininchampoyouaj. Uajka tetajmej momachtiaj tlen uelis kinpaleuis inijuantij o ininkoneuaj, uan ni kichiuaj ininchaj. Katli itstokej ininselti uelis kuali kitekiuisej nopa tonali. Uelis momachtisej se tlamachtili ipan Biblia tlen kitlapejpenisej.

Kichiua nojua kuali ma tijnechkauikaj Jehová. “Ximonechkauikaj kampa toTeko uan yajaya inmechnechkauis.” (Santiago 4:8.) Kema timomachtiaj Biblia kuali tikixmatij Jehová uan tlen kichiua. Uan ta ueliskia tijpeualtis timomachtis ininuaya mochampoyouaj kema sansejko inkipouasej Biblia. Uelis inkipojtiasej tlen ipan nopa semana moixtomas ipan Tlanechikoli Kej Timonejnemiltiaj uan Titlajtolmoyauaj. Nochi uelis inkipouasej se achi uan teipa uelis inkiijtosej tlake inmechmachtia.

Kichiua tlauel kuali ma timouikakaj ika tochampoyouaj. Tlaj se tlakatl momachtis Biblia iuaya isiua o tetajmej ininuaya ininkoneuaj, kinpaleuis tlauel ma moiknelikaj. Kema momachtisej moneki yolpaktosej uan nochi moneki kinektosej momachtisej sejse chikueyi. Uelis tetajmej kinekisej momachtisej ipan Tlen Tematiltia uan ¡Despertad! o ipan Internet kampa jw.org/nch tlen ueliskia kinpaleuis sejse ininkoneuaj, o uelis kiitasej kenijkatsa ininkoneuaj uelis kiijiyouisej tlaouijkayotl tlen kipiaj kampa momachtiaj. Kualtiaskia kiitasej sansejko se video tlen eltok ipan JW Broadcasting (tv.pr418.com). Nojkia ueliskia momachtisej uikasej tlen motekiuis ipan tlanechikoli, uan teipa kema tlamisej momachtisej uelis kikuasej se tlenijki.

Ni tonali tlen tijkauaj sejse chikueyi kema tijueyichiuaj Jehová, kichiua ma tiyolpakikaj pampa timomachtiaj iTlajtol ika tochampoyouaj, uan ya tlauel techteochiuas pampa tijchiuaj kampeka timomachtisej sansejko (Salmo 1:1-3).

• ¿Kenke tijkauaj se achi tonali uan kej nopa tijueyichiuaj toTeotsij ininuaya tochampoyouaj?

• ¿Tlake ueliskia kichiuasej tetajmej uan kej nopa nochi yolpaktosej kema momachtisej?