Desde ikia, Jehová kineki iga te̱tajmej wan ipilowa̱n mamonechkokan iga maonokan ma̱j ina̱ Dios wan maonokan ma̱j sekan (Deuteronomio 6:6, 7). Inó̱n iga, yej tajto̱lmoya̱waj de Jehová cada semana monechkowaj pan icha̱n iga makiweychi̱wakan Dios wan ifamiliaj, wan mamomachti̱kan pan Biblia kén welij kichi̱waj iga maonokan ma̱j ina̱ Dios. Yej ise̱lti cha̱ntitokej wel kikuij iní̱n tiempoj iga makiweychi̱wakan Dios, kua̱ momachtiáj se̱ tema de Itajto̱l Dios yej yejeme̱n kitapejpenkej.

Te̱pale̱wiá iga matonokan ma̱j ina̱ Jehová. «Ximona̱techo̱kan ka̱n Dios wan yéj yawi mona̱techo̱ti kan anmejeme̱n» (Santiago 4:8). Kua̱ timomachtiáj Biblia ma̱j tikye̱ʼixmatij Jehová wan kén kichi̱wa tejté̱. Kua̱ anmomachtiáj wan anmofamiliaj wel ankitajto̱ltiáj Biblia, wan wel ankitajto̱ltiáj yej pan inó̱n semana tiawij timomachti̱tij pan tanechko̱lis Matinemikan wan Matitekipano̱kan iga Jehová. Sejse̱ de anmejeme̱n wel ankitajto̱ltiáj achi de Itajto̱l Dios, wan de ompa nochimej wel ankijtowaj te̱ anmomachtijkej.

Te̱pale̱wiá iga matonokan ma̱j sekan wan tofamiliaj. Kua̱ se̱ ta̱gaʼ momachtiá Biblia wan isiwa̱ o te̱tajmej wan ipilowa̱n, iní̱n kichi̱wa iga ma̱j mamonekikan. Moneki mayo̱lpaktokan wan makiye̱ʼmatikan kua̱ momachtiáj, nochipa makichi̱xtokan iga mamomachti̱kan. Te̱tajmej wel kite̱mowaj te̱ momachti̱skej wan sejse̱ de ipilowa̱n pan revistas La Atalaya wan ¡Despertad!, o pan jw.org, o wel kitaj kén welij kixtajmakaj se̱ yo̱lmiktilis yej nemi kipano̱ltiáj kan momachtiáj. Wan ¿té íga ayá̱ ankitaj se̱ programa de JW Broadcasting (tv.pr418.com) wan ankijtowaj te̱ anmomachtijkej? Wel no̱ anmomachtiáj takuikalis yej mokui̱kas pan tanechko̱lis wan kua̱ antamiskej wel ankikuaj achi tejté̱.

Iní̱n tiempoj yej tikuij cada semana iga matikweychi̱wakan Jehová, kichi̱wa iga tofamiliaj ma̱j mamomachtisneki Biblia, wan Jehová te̱makas komati tejté̱ ye̱kti iga tikchi̱waj iní̱n (Salmo 1:1-3).

• ¿Té íga moneki iga wan tofamiliaj matikweychi̱wakan Dios?

• ¿Te̱ wel kichi̱waj te̱tajmej iga nochimej mapa̱kikan kua̱ momachtiáj?