Okuruga ira, Yehova naayenda ngu ab’omu buri ka batungye obwire bw’okuba hamwe okubaasa kugira omukago guhami nawe n’okuhamya omukago gwabo nk’eka. (Eky’Ebiragiro 6:6, 7) Egi niyo nshonga ahabw’enki ab’omu buri ka y’Abajurizi ba Yehova, buri saabiiti nibagira obwire bw’okugaaniira hamwe aha by’omwoyo ebirikuhikaana n’ebyetengo byabo. N’obu waakuba nootuura wenka, obwire nk’obwo noobaasa kubukoresa kwega ebirikukwata ahari Ruhanga ebi otooraine.

Okuramya okw’eka n’obwire bw’okwirira haihi Yehova. Yakobo 4:8 nihagira hati: “Mwirire haihi Ruhanga, nawe abone kubairira haihi.” Twayega aha bi Yehova arikukora n’aha mitwarize ye kurabira omu Kigambo kye, nitweyongyera kumumanya gye. Omuringo gworobi ogu murikubaasa kutandikamu okuramya okw’eka n’okushoma Baibuli omu iraka ririkuhurirwa, obundi murikukuratira entebeekanisa ya buri saabiiti eya Obuheereza bwaitu n’Oku Turikutwaza. Buri omwe omu ka naabaasa kuheebwa ekicweka ky’okushoma, reero mugaaniire aha bi mwegire omu Byahandiikirwe.

N’obwire bw’okuhamya omukago gwanyu nk’eka. Omushaija n’omukazi we, abazaire n’abaana baabo, baayega kumwe Baibuli nibahamya omukago gwabo. Okwega okwo kushemereire kuba nikushemeza kandi buri omwe omu ka arikwenda kukubamu buri saabiiti. Abazaire nibabaasa kutoorana eby’okwegaho kurugiirira aha myaka y’abaana baabo, obundi barikukoresa ebicweka ebiri omu Watchtower nari Awake! nari aha mukura gwaitu jw.org. Nimubaasa kugaaniira aha buremeezi obu abaana baanyu batungire aha ishomero n’oku baraabusingure. Nimubaasa kureeba puroguraamu ya JW Broadcasting (tv.pr418.com) reero mugigaaniireho. Nimubaasa kwegyeza omu byeshongoro ebirikuza kukoresibwa omu nteerane reero bwanyima mugireho obwire bw’okweshemeza.

Obwire obu murikumara buri saabiiti murikuramya Yehova nk’eka nibwija kuhwera buri omwe omu ka kukunda Ekigambo kye, kandi naija kubaha omugisha omu kuteeraho kwanyu.—Zaaburi 1:1-3.

• Ahabw’enki nitutaho obwire kuramya nk’eka?

• Abazaire nibabaasa kureetera bata buri omwe omu ka kukunda okuramya okwo?