Nkabalilo kakunyuma, Yehova alondagha imbumba yiliyosa yiyeghe nakabalilo kakuya pampene, ukukasya ubumanyani na Yehova kangi ukukasya ubukamu pakati pabo. (Ukukumbusya Indaghilo 6:6, 7) Yo nongwa yake sabata aliwesa Abaketi ba Yehova bakuya nakabalilo kakumanyilila pampene ukuya mbumba—bakuya babuke linga boyobesania, bomanyila amasyu gha Kyala ufwana na ifi filondiwa pa bumi bwabo. Pope linga kwikala wimwene ubaghile ukuya nakabalilo kakumanyila amasyu gha Kyala.

Kabalilo kakuseghelela kwa Yehova. ‘Amuseghelele kwa Kyala, po yope isakuseghelelagha kumyinu.’ (Yakobu 4:8) Linga tumanyila amasyu ghake iBaibolo, po tukwisa kum’manya kanunu Yehova nubundu bwake. Injila imbepe yakwandila umanyila naba m’nyumba yinu kokubelenga iBaibolo mwakukwesya amasyu, lumo mubaghile ukonga imbatiko ya sabata aliwesa iya Ukufumusya nu Bumi Bwitu, Imbatiko yangomano syitu. Mubaghile uyabana ifiyabo fyakuti mubelenge, pabumalilo muyobesanie ifi mumanyile ufuma m’malemba.

Kabalilo kakukasya ubukamu bwitu na binitu ba pambumba. Abanyambala na bakasi babo, abapapi na bana babo bokasya ubukamu bwabo linga bomanyila iBaibolo pampene. Aka kayeghe kabalilo kakuti aliwesa ahobokeghe nako. Abapapi babaghile usala inkhani simo ukuti bayobesanie na bana babo ufwana nifinja fyabo. Mubaghile ubombela Gongwe, Wukani pamo Webusayiti yithu ya jw.org. Muyobesanieghe nabana binu indamyo isi bakwaghana nasyo linga bali ku sukulu namuno babaghile umalanilana nasyo. Mubaghile uketelela kangi amavidiyo pa JW Broadcasting (tv.pr418.com), pabumalilo muyobesyanie ifi m’manyilepo. Mumanyileghe inyimbo isi mukuya pakwimba pangomano kangi muyeghe nakabalilo kakwangala pampene linga mumalile umanyila.

Linga mumanyila ni mbumba yinu sabata aliwesa, umwe naba m’mbumba yinu mukuya pohoboka nifimanyilo ifi mumanyila m’masyu gha Kyala kangi mukwisa kusayiwa na Yehova.—Masalimo 1:1-3.

• Nongwa yafiki tukuya nakabalilo kakumanyilila pampene ukuya mbumba?

• Ngimba abapapi babaghile ubomba bulebule ukuti akabalilo kakumanyila kayeghe kakuhobosya?