Ɔvi tete ne, ɛnee Gyihova kpondɛ kɛ mbusua nyia mekɛ maa bɛ nwo, bɛnyia sunsum nu anyuhɔlɛ na bɛ nee bɛ sua nu amra nyia agɔnwolɛvalɛ kpalɛ. (Ditilɔnomi 6:6, 7) Ɛhye ati a Gyihova Alasevolɛ ye mekɛ bie sie ɛkɛ dapɛne biala fa yɛ abusua ɛzonlenlɛ na bɛsuzu sunsum nu ninyɛne mɔɔ di bɛ ngyianlɛ fɔɔnwo bie anwo gyima la anwo a. Saa ɛ ngome a ɛde bɔbɔ a, ɛbahola wɔava mekɛ ɛhye wɔabikye Nyamenle ɔlua Baebolo ɛzukoalɛ ngyehyɛleɛ mɔɔ ɛbayɛ la azo.

Ɔle mekɛ mɔɔ maa yɛbikye Gyihova kpalɛ. “Bɛbikye Nyamenle, na ɔbabikye bɛ.” (Gyemise 4:8) Saa yɛsukoa Gyihova subane nee ye nyɛleɛ ne mɔ anwo ninyɛne dɔɔnwo wɔ ye Edwɛkɛ ne mɔɔ bɛhɛlɛ la anu a, ɔmaa yɛnwu ye kpalɛ. Adenle sikalɛ mɔɔ bɛkola bɛdua zo bɛbɔ bɛ abusua ɛzonlenlɛ ne abo la a le kɛ bɛbava mekɛ ne bie bɛabɔ nu bɛagenga Baebolo ne kpole, na bie a bɛali dapɛne Yɛ Ɛbɛlabɔlɛ Nee Yɛ Ɛzonlenlɛ Nyianu ngyehyɛleɛ ne anzi. Bɛbahola bɛahyɛ ɛgengalɛ ne bɛamaa bɛ nwo, na akee bɛ muala bɛazuzu debie mɔɔ bɛzukoa ye wɔ Ngɛlɛlera ne anu la anwo.

Ɔle mekɛ mɔɔ abusua ne bikye bɛ nwo kpalɛ. Saa kunlima nee yelɛma, awovolɛ nee ngakula bɔ nu sukoa Baebolo ne a, ɔmaa bɛ agɔnwolɛvalɛ ne anu mia. Ɔwɔ kɛ ɔyɛ anyelielɛ nee anzodwolɛ mekɛ mɔɔ awie biala anye la ye ade wɔ dapɛne ne anu a. Awovolɛ bahola agyinla ɛvolɛ mɔɔ bɛ mra ɛli la azo akpa edwɛkɛtile mɔɔ fɛta la, bie a bɛbazuzu edwɛkɛ mɔɔ wɔ Ɛzinzalɛ Arane nee Awake! nu anzɛɛ mɔɔ wɔ yɛ Wɛbsaete, jw.org azo la bie anwo. Bɛbahola bɛabɔ ngyegyelɛ mɔɔ bɛ mra yiale ye wɔ sukulu la anwo adawu amaa bɛanwu kɛzi bɛbali nwolɛ gyima la. Duzu ati a bɛnnea gyimalilɛ bie wɔ JW Broadcasting (tv.pr418.com) azo na bɛmbɔ nu bɛnzuzu nwo a? Bɛbahola bɛabɔ nu bɛazukoa edwɛne mɔɔ bɛbado ye wɔ debiezukoalɛ bo la bie na bɛava debie bɛaheha bɛ nloa wɔ mekɛ mɔɔ bɛwie bɛ abusua ɛzonlenlɛ ne yɛ la.

Mekɛ titili ɛhye mɔɔ bɛfa bɛbɔ nu bɛsonle Gyihova dapɛne biala la boa abusua ne kɔsɔɔti maa bɛ nye die Nyamenle Edwɛkɛ ne anwo, na ɔbayila bɛ mɔdenlebɔlɛ ne azo.​—Edwɛne 1:1-3.

• Duzu ati a yɛye mekɛ yɛsie ɛkɛ yɛfa yɛyɛ abusua ɛzonlenlɛ a?

• Kɛzi awovolɛ bɛamaa mekɛ ɛhye ayɛ anyelielɛ amaa abusua ne ɛ?