Jehova hott noch immah havva vella es families zeit shpenda mitt-nannah, so’s si naychah kumma kenna zu nannah un zu een. (5 Mosi 6:6, 7) Sell is favass Jehova Sei Witnesses zeit nemma ay moll di voch fa Jehova deena mitt-nannah es en family. Si shvetza veyyich spiritual sacha es alli-ebbah helfa kann. Even vann du laynich voonsht, du kansht dee zeit yoosa fa naychah kumma zu Gott bei ebbes shtodya es gebayst is uf di Bivvel.

’Sis en zeit fa naychah kumma zu Jehova. “Kummet nayksht zu Gott un eah kumd nayksht zu eich.” (Jakobus 4:8) Miah lanna veyyich Jehova deich sei Vatt, di Bivvel, un lanna een bessah kenna bei may fashtay vi eah denkt un vi eah sacha dutt. En goodah vayk fa family-zeit shteahra is di Bivvel laut laysa mitt-nannah, fleicht di chapters es gmenshind sinn fa di Ministry un Layva Meeting. Alli-ebbah in di family kend en section funn’s Bivvel layses du, un no awl mitt-nannah shvetza veyyich vass miah lanna.

’Sis en zeit es di family naychah kumma kann zu nannah. Vann en family mitt-nannah di Bivvel shtoddit, dutt’s mann un fraw, un eldra un kinnah naychah zammah bringa. Es sett en haebbi un peaceful zeit sei es alli-ebbah faddi gukt ditzu. Eldra sedda subjects tshoosa es iahra kinnah fashtay kenna, fleicht funn Da Vatshtavvah un anri publications, adda ebbes funn unsah website, jw.org. Es veah aw en goodi zeit fa shvetza mitt di kinnah veyyich en problem es ufkumma is in di shool, un no aw vass si helfa kann. Ma kend aw ebbes vatsha uf JW Broadcasting (tv.pr418.com) un no shvetza diveyya. Dayl families singa songs es ksunga sei zayla an di fasamling, un henn shnaeks noch es si faddich sinn.

Bei Jehova deena vi dess alli voch zayld’s di gans family helfa enjoya di Bivvel shtodya. Jehova zayld eich helfa bennafida funn eiyah efforts.​—Psalm 1:1-3.

• Favass is family-zeit fa Jehova importand?

• Vass kenna eldra du so es alli-ebbah’s enjoyt?