Jehova es doa noch emma om todoonen jewast, daut de Famielje toop Tiet vebrinjen sull, soo daut aule äaren Gloowen stoakjen kunnen un sikj dolla vebungen feelden (5. Mose 6:6-7). Krakjt doawäajen nämen Jehova siene Zeijen sikj jieda Wäakj Tiet, om jemietlich toop de Schreft to studieren un soont derchtogonen, waut an aus Famielje wiedahalpen kaun. Un wan eena auleen wont, kaun eena sikj krakjt soo goot Tiet nämen, om fa sikj selfst to studieren un Gott noda to komen.

Daut wie Jehova noda komen. “Nodat junt no Gott, dan woat hee uk dicht no junt komen” (Jakobus 4:8). Wan wie en Jehova sien Wuat läsen, dan see wie, woo hee es un waut hee deit, un wie lieren dän bäta kjanen. Aum Aunfank von daut Famieljenstudium wudd eena kjennen toop waut en de Schreft läsen. Daut kunnen biejlikj de Kapitels sennen, waut en de School fa Läwen un Deenst derchjenomen woaren. Jieda eena kaun een Poat väaläsen un dan aula toop doavon räden, waut eena doarut lieren kaun.

Daut wie ons en de Famielje dolla veeent feelen. Wan de Famielje toop de Schreft studieet, feelen de Elren un de Kjinja sikj dolla vebungen un uk de Lied selfst. Daut studieren saul eene scheene un frädelje Tiet sennen, wua aule sikj too freien. Krakjt doano, woo oolt de Kjinja sent, kjennen de Elren sikj waut vom Wachtturm un Erwachet! ooda von onse Websied jw.org utläsen, waut see derchgonen wellen. Ooda veleicht haben de Kjinja irjenteenen Trubbel en de School. Dan kaun de Famielje waut studieren, waut dee halpt, doamet foadich to woaren. Ooda jie kjikjen een Video ooda Film von JW Broadcasting (tv.pr418.com) un räden dan doaräwa. Eena wudd uk kjennen de Leeda eewen, waut en de Vesaumlunk jesungen woaren, un lota veleicht noch toop een bät waut äten ooda drinkjen.

Wan de Famielje jieda Wäakj toop de Schreft studieet, dan woat daut fa aule eene besondre Tiet sennen. Dee woaren aun Gott sien Wuat Freid haben un Jehova woat dee doafäa säajnen (Psalm 1:1-3).

• Wuarom näm wie ons Tiet, aus Famielje to studieren?

• Waut kjennen Elren doonen, daut daut Famieljenstudium fa aulem scheen es?