Unaymanta, Jehová munara familias cuscas tianancuta, amistarnincuta Jehovaan sinchiyachíypaj y sujhuan sujhuan cuscayascka tianancuta (Deuteronomio 6:6, 7). Chayraycu, Jehóvap testigusnin sapa semana suj tiempút sorckoycu familia ina Yayát adoráypaj, estudias lecciunesta Bibliamanta ima sapa suj familiamanta yanapan, suj lugarpi ni imapas estorbapucuchun. Astaanpas picunas sapallan causancu, tiempút Yayápaj sorckoyta atincu estudiáypaj huaquin lecciunesta Bibliamanta ima paycuna ajllancu.

Suj oportunidar Jehovaman astaan ckemicúypaj. «Yayaman ckemicuychis, y pay ckamcunaman ckemícoj ’rin». (Santiago 4:8). Jehovát allít ’rejsiycu áicap Bibliapi aprendeycu imaina pay can y ’ruasckanmanta. Ckallaricuyta atin familiaan Bibliát cuscas sinchít lees, seguis programát semanápaj Tantacunamanta Vida y Ministerio. Sapa suj, suj partét leeyta atin; chaymantá túcuy comentayta atincu imastas ima Bibliamanta aprenderancu.

Suj oportunidar familiápaj astaan cuscayascka tianancunápaj. Ckosas y huarmisnincu, tatas y huaas astaan cuscayasckas tíaj ’rincu, áicap Bibliát cuscas estudiancu. Cá momentu cusiscka y pasmanta canan tían, cá momentút túcuy cusiyuan suyanancu tían. Tal vez tatas estudiayta munancu lecciunesta Atalayamanta y Despertadmanta o paginaycu internetmanta jw.org, según huaaspa edarnincuna. ¿O ímaj mana ckaanquísh programa televisiunmanta JW Broadcasting y chaymantá cuscas analisayta atinquísh? O estudiayta atincu huaquin problemas ima huaas escuelapi apincu imaina allichayta atincu. Canciones practicayta atincu ima tantacunaspi cantácoj ’rincu y chaymantá puchucáypaj, huaquin micuna micuyta.

Alli tiempút sapa semana sorckoycu Jehovát adoráypaj, y chay yanapan Yáyap ’Rimaynin suj cusicúypaj túcuy familiápaj canánpaj, y Jehová esfuersusniycuta anchata bendécej ’rin (Salmos 1:1-3).

• ¿Imajchu tiempút sorckoycu familia ina Yayát adoráypaj?

• Tatas, ¿Imát ’ruayta atincu cá momentu familiasnincu disfrutanancúpaj?