Hundi yannanni kayise Yihowa mitte mittenti maate mitteenni gamba yite ayyaanaamittensanna mereeronsa noo baxille lossidhara hasiˈranno. (Marro 6:6, 7) Yihowa Farciˈraasine lamalate kiiro maatensa ledo mitteenni magansiˈrate yanna gaaˈmitannohu iseraati; togoo woyite maatensara roore kaaˈlitannota Qullaawa Borro hedo hisanyootunni hasaabbanno. Callikki heeˈrattoha ikkiro nafa, Qullaawa Maxaafa xiinxallate umikki pirogiraame fushshidhe togoo yanna Maganunniwa shiqate horoonsiˈra dandaatto.

Maatete magansiˈra Yihowawa shiqate kaaˈlitanno. “Maganunniwa shiqqe, isino kiˈnewa shiqannona.” (Yaaqoobi 4:8) Yihowa akattarenna assinore hixamanyine Qullaawu Maxaafinni ronsanni haˈnummoro, iso albinni roore egenninanni haˈneemmo. Maatete magansiˈra mite yine hanafate Qullaawa Maxaafa qoonqo gotti assine bado bado nabbawa dandiinanni; lawishshaho, lamalannita Kiristaanu Heeshshonna Soqqansho Gambooshshi pirogiraame harunsine nabbawa dandiinanni. Nabbawate gaammoonni fooliishshuwa maatete giddo noorira mittu mittunkura beenkeenna nabbabbu gedensaanni, baalunku Qullaawa Borronni afiˈrino hedo mitteenni hasaawa dandiinanni.

Maatete magansiˈra maate mimmitu ledo lubbora baxantanno gede assitanno. Minaanninna minaama, hattono annuwu, amuuwunna ooso Qullaawa Maxaafa mitteenni xiinxallitannoha ikkiro, mereeronsa noo baxilli lexxanni haˈranno. Tenne yanna hagiidhinannita, salaame woˈmitinotanna quqquxamme agadhinannita assiˈra hasiissanno. Annuwunna amuuwu oosonsa diri garinni, maatensara roore kaaˈlitanno hedo dooriro danchaho; lawishshaho, Agarooshshu Shaenna Baqqi Yiiyye! yinanni borro giddonni woy jw.org/sid yinanni webisayitenke aaninni mito birxicho doora dandiinanni. Rosu mine oosoˈne qarrisannorenna hakkoye qarra qeela dandiitanno gara hasaawa dandiitinanni. JW Biroodikaaste (tv.pr418.com) yinannihu televizhiinete xaawira fultanno pirogiraame mitteenni laˈine hasaabbe. Songote gambooshshiwa faarsinanni faarso mitteenni rosiisiˈranna maatete magansiˈra gedensaanni mitore sagaˈlanna hagiirsiisannore assa dandiitinanni.

Maate mitteenni gamba yite lamalate kiiro konni garinni Yihowa magansiˈransa, baalunku Maganu Qaale xiinxallatenni hagiidhanno gede assitanno; Yihowano maassiˈrannonsa.—Faarso 1:1-3.

• Maatete magansiˈrara yanna gaaˈma hasiissinohu mayiraati?

• Annuwunna amuuwu togoo yannara baalunku hagiidhanno gede assa dandaannohu hiittoonniiti?