M’asɔɔ, Yehova akopake ante anto lá nkfumbo wasanghanake esanga dj’iwɔ nkembiɛ djokanelo dj’iwɔko la Ndjambe la l’antei k’iwɔko yomɛlɛ. (Mvungo K’ɛlɛmbɛ 6:6, 7) Djɔko nde Atemwe ye Yehova otshikakawɔ ndambo ke wíná lobengo la lobengo dje nkfumbo nkoka nyumiɛ Ndjambe esanga. Lá wíná ɔkɔ we vu, wambake wambá w’akambo we Ndjambe, lá ndenda djonyi dje nkfumbo k’iwɔko. Kondo nde opakɔ l’onto gkambo ewɛ ngo wɛ nghɔmɛlɛ, kondo nde koko ewɛ Temwe ngo wɛ nghomɛlɛ lá nkfumbo k’inyoko, ekoka ndjalá wíná we wɔlɔ efula we wɛ ndjetshɛ nya Ndjambe nde ɔmbɔsɔna dje ndjeka djambá mɔtshi dje lá Bible.

Elekɔ wíná we malemema Yehova wɔlɔ. Bible ante: “Nyomaleme Ndjambe ko nde angokomalema.” (Djakɔbɔ 4:8) Toyɛke yewa Yehova wɔlɔ nde tona dje ndjewa djekeka dje nd’eko l’elemo we nd’eko ma Bible, Otepela we nd’eko. Wopo ɔmɔtshi w’osadju we nkoka mbanga nyumiɛ Ndjambe lá nkfumbo nde ndjetshɛ ndambo ke wíná lá ntangaká Bible lá djoyi dje lá djiko. Nyoyokoka ntanga kondo etenyi ke Bible ke yombilá lá programe ke Kalasa k’Olemo we Teokrasi ke lobengo ɔkɔ. Nyoyokoka mpɛyɛ onto l’onto etenyi ɛmɔtshi ke nde ntanga, ko ma mbisa ɛkɔ, nyoyamba wamba l’akambo akɔ wanɛ nyombotanga lá Bible.

Elekɔ wíná we malema ase nkfumbo k’ɛko wɔlɔ. Djokanelo dje mpame la wadji, ambotshi la wana, bongake efula nde iwɔ weka Bible esanga lá nkfumbo. Wekelo ɔkɔ ewɔ la dje ndjalá nde wíná ɔmɔtshi w’osasa, we vu, wíná we ase nkfumbo okongelakawɔ l’osasa lobengo la lobengo. Lá ndenda amvula ye wana, ambotshi wakoka nsɔna wamba amɔtshi wanakoka nkotshɛ nkfumbo, mbala imɔtshi wamba we ma Etange k’olami [La Tour de Garde] kondo ma Nyowetsho! [Réveillez-vous !] kondo ma site k’isoko ke jw.org. Nyokoka ndjambá dje gkambo mɔtshi na wana yɛnyi lá kalasa, la wopo ɔkɔ nke wakokawɔ nangha lá gkambo gkɔ. Nyokoka ndjeka tembo tonangotshumbama lá nsanghanyɛ, ko ndɛ kondo n-nɔ ekete ɛmɔtshi ma mbisa ke wekelo.

Ndjetshɛ wíná nghonyi lobengo la lobengo dje nyumiɛ Yehova engokotshɛ onto l’onto lá nkfumbo dje nde nkɔpa Otepela we Ndjambe, ko Ndjambe nde ko angokosakola efula l’akambo wanɛ onanghanyo.​—Yeembo 1:1-3.

• Otshikakaso wíná ɔmɔtshi dje nyumiɛ Ndjambe lá nkfumbo la nke?

• Ambotshi okokawɔ nangha mo dje wekelo ɔkɔ ndjalá osasa le ase nkfumbo k’otondo?