Hii sha ashighe a tsuaa la je, Yehova soo ér hanma tsombor yô, u teman imôngo sha er mba hen tsombor vea seer lun a na kôôsôô, shi ve ayol a ve kpa vea seer lun kôôsôô yô. (Duteronomi 6:6, 7) Ka nahan ve Mbashiada mba Yehova ka ve ver shighe ken hanma kasua sha u civir Aôndo hen icombor ve ye. Ka ve tema hoghom hoghom, ve lam sha akaa a ken jijingi a a zough sha mbamgbe vev la. Aluer u ngu tswen je kpa, u fatyô u tôôn ian ne kporom ikyua a Aôndo, sha u henen kwagh u u tsough u henen ken Bibilo la.

Mcivir u hen tsombor ka shighe u seer kporom hen Yehova. Bibilo kaa ér: “Kporom nen hen Aôndo, Un kpaa, Una kporom her a ven.” (Yakobu 4:8) Ka sea henen kwagh u mlu u Yehova man ityom na vighe vighe ken Bibilo, i i lu mkaanem nam la yô, se hemba fan un. Gbenda môm u se hii mcivir u hen tsombor ve a lu se ican ga yô, ka u panden shighe u se ver u civir Aôndo imôngo la, ôron Bibilo duen sha. Se fatyô u ôron mtom ma Bibilo ma ka i tese ér i vande ôron sha u wan ago iyol sha Makeranta u Henen Tom u Hemen u Aôndo, u i eren hanma kasua la. A fatyô u nan hanma or u hen tsombor ijiir i nana ôr yô. Nahan, a ôron Bibilo a been yô, hanma or nana fatyô u pasen kwagh u nan hen ken Ruamabera la.

Mcivir u hen tsombor ka shighe u wasen mba hen tsombor u seer lun kôôsôô. Tsombor ka ua kohol imôngo ua henen Bibilo yô, noov man kasev ve seer lun kangenaa, shi mbamaren kpa ve hemba lun a ônov vev kôôsôô. Doo u shighe ne una lu shighe u saan iyol man u kundu kundu, u hanma or hen tsombor nana veren ashe a mi ken hanma kasua yô. Mbamaren vea fatyô u keren atineakaa a aa wase tsombor ve la, timen sha mi. Vea fatyô u timen sha ngeren mba ken Iyoukura man Awake!, mba vea taver ônov vev u kaven ga yô. Ne fatyô u lamen sha ma zayol u mbayev ve tagher a mi ken makeranta yô, man er vea nenge sha zayol shon la kpaa. Ne fatyô u henen atsam a a gber ken mbamkombo la, shi yan kwagh shighe u ne bee mcivir u hen tsombor wen la.

Shighe u injaa u tsombor u ver u civir Yehova imôngo ken hanma kasua la, una wase hanma or hen tsombor u henen mkaanem ma Aôndo saan saan, shi Yehova una ver iniôngon yen la doo doo kpaa.—Pasalmi 1:1-3.

• Se mba veren shighe u civir Aôndo hen tsombor sha ci u nyi?

• Mbamaren vea er nan ve shighe u mcivir u hen tsombor la una lu shighe u doon hanma or hen tsombor ve?