Talu mai nā taimi anamua, nae fofou ia Ieova mo nā kāiga takitahi ke fakafano he taimi ke mafuta fakatahi ai, e fakamālohi ai te latou itū fakateagaga ma fakamakeke te latou hokotaga. (Teutelenome 6:​6, 7) Ko te mafuaga tēnā e fakatulaga ai e Molimau a Ieova he vaitaimi i nā vaiaho takitahi mo he tāpuakiga a te kāiga​—ke talanoa ai, i he hikomaga toka ma filēmū, ma nā matakupu fakateagaga e fetaui ma o latou manakoga. E tuha lava pe nā ko koe oioti, ko nā taimi lelei iēnā e fano aogā mo te Atua i he galuega e filifili lava e koe i te hukehuke o te Tuhi Paia.

Te tāpuakiga a te kāiga ko he taimi e fakatafapili atu ai ki a Ieova. “Fakatafapili ki te Atua, oi fakatafapili mai ai ia ki a te koutou.” (Iakopo 4:8) E atili tatou iloa lelei Ieova kāfai e akoako ki tatou e fakatatau ki ona uiga ma ana gaoioiga e ala i tana Kupu te Tuhi Paia. Ko he auala faigofie ke kamata ai he tāpuakiga a te kāiga ko te fakafano he taimi ke faitau leo lahi fakatahi te Tuhi Paia, hōvē kāfai e mulimuli atu ki te fakahologa mo te vaiaho mo te Ākoga mo nā Tino Talaki. E mafai oi tōfia he vaega o te faitauga ki nā tino takitokatahi o te kāiga, ma mafai oi talanoa ai ki latou uma i nā mea mai nā Tuhituhiga Paia.

Ko tēnei te taimi e fakatafapili atu ai ki nā tino o te kāiga. Ko nā tāne ma nā āvaga, fakatahi ma mātua ma fānau, e fakamalohia a latou hokotaga kāfai te kāiga kātoa e hukehuke te Tuhi Paia. E tatau ke kavea ma he taimi fiafia, ma te filēmū ma nonofo fakatalitali atu te kāiga kātoa ki te mea tenei e tupu i nā vaiaho takitahi. E fakalagolago ki te matutua o te lā fānau, e mafai e nā mātua ke filifili ni matakupu aogā ke talanoa ki ei, hōvēia e fakaaogā ni vaega mai The Watchtower ma te Awake! pe ko te matou Tuatuhi i te Initeneti, jw.org. E mafai oi talanoa koutou ki he fakafitauli na tupu ki he tamaiti i te ākoga ma te auala e mafai oi fakafeagai ai. Hōvēia e fiafia koutou ke fakatakitaki nā pehe ka uhu i nā hauniga ma fai foki he meakai kāfai kua uma te tāpuakiga a te kāiga.

Ko te taimi fakapitoa tēnei e fakafano i nā vaiaho takitahi e tāpuaki fakatahi atu ai ki a Ieova e fehoahoani atu ki nā tino uma i loto o te kāiga ke maua te fiafia i te hukehuke ki te Kupu a te Atua, ma fakamanuia lahi e ia a koutou taumafaiga.​—Halamo 1:​1-3.

• Aiheā e tuku kehe ai e ki matou he taimi mo te tāpuakiga a te kāiga?

• E mafai vēhea e mātua oi kavea te vaitaimi tēnei ma he taimi fiafia mo te kāiga kātoa?