Talu mei he kuonga mu‘á mo e fiema‘u ‘e Sihova ‘a e fāmili taki taha ke nau fakamoleki ‘a e taimi fakataha, ‘i hono ‘ai ke mālohi honau tu‘unga fakalaumālié mo ‘ai ke mālohi ‘a honau fāmilí. (Teutalōnome 6:6, 7) Ko e ‘uhinga ia ‘oku vahe‘i ai ‘e he Kau Fakamo‘oni ‘a Sihová ha taimi ‘i he uike taki taha ke lotu fakataha ai ‘a e fāmilí​—‘o fetalanoa‘aki, ‘i ha tu‘unga nonga ki he ngaahi me‘a fakalaumālie ‘oku fe‘unga tonu mo ‘enau ngaahi fiema‘ú. Neongo kapau ‘okú ke nofo toko taha, ko e taimi peheé ‘e lava ke fakamoleki lelei ia mo e ‘Otuá ‘i hano ako fakaikiiki ha kaveinga ‘okú ke fili ‘i he Tohi Tapú.

Ko ha taimi ia ke ‘unu‘unu ofi ange ai kia Sihova. “‘Unu‘unu ofi ki he ‘Otuá, pea te ne ‘unu‘unu ofi mai kiate kimoutolu.” (Sēmisi 4:8) ‘Oku mau hoko ‘o ‘ilo lelei ange kia Sihova ‘i he taimi ‘oku mau ako ai ‘a e ngaahi fakaikiiki fekau‘aki mo hono ‘ulungāngá mo ‘ene ngaahi ngāué fakafou ‘i he ngaahi peesi ‘o ‘ene Folofola kuo tohí. Ko ha founga faingofua ke kamata ai ho‘o lotu fakafāmilí ko hono fakamoleki ha taimi ki hono lau le‘o-lahi fakataha ‘a e Tohi Tapú, ‘o muimui nai ‘i he taimi-tēpile fakauike ki he Fakataha ki he Moʻuí mo e Ngāue Fakafaifekaú. ‘E lava ke vahe‘i ha konga ‘o e lautohí ki he mēmipa taki taha ‘o e fāmilí, pea ‘e lava ke lāulea leva ‘a e tokotaha kotoa ki he me‘a kuó ne ako mei he Folofolá.

Ko ha taimi ia ke ‘unu‘unu ofi ange ai ki he ngaahi mēmipa ‘o e fāmilí. Ko e ngaahi husepānití mo e ngaahi uaifí, pehē ki he ngaahi mātu‘á mo e fānaú, ‘oku nau ‘ai ke mālohi ‘a honau vaha‘angataé ‘i he taimi ‘oku nau ako fakafāmili ai ‘a e Tohi Tapú. ‘Oku totonu ke hoko ia ko ha taimi fakafiefia mo melino pea ko ha me‘a mahu‘inga ia ‘o e uiké. Fakatu‘unga ‘i he ta‘umotu‘a ‘o ‘enau fānaú, ‘e lava ke fili ‘e he ngaahi mātu‘á ha ngaahi kaveinga ‘aonga ke lāulea ki ai, ‘o ngāue‘aki nai ‘a e ngaahi konga mei he Taua Le‘o mo e ‘Ā Hake! pe mei he‘emau uepisaiti, jw.org. ‘E lava ke mou talanoa fekau‘aki mo ha palopalema kuo fetaulaki mo ho‘omou fānaú ‘i he ‘apiakó pea mo e founga ke fekuki ai mo iá. Fēfē ke mou sio ʻi he polokalama televīsone JW Broadcasting (tv.pr418.com) pea lāulea fakataha ki ai ʻi heʻene ʻosí? Te mou fiefia nai ‘i hono ako ‘a e ngaahi hiva ‘e hiva‘i ‘i he ngaahi fakatahá pea ‘i hono ‘ai ha ki‘i kai hili ‘a e lotu fakafāmilí.

Ko e taimi makehe ko eni ‘oku fakamoleki ‘i he uike kotoa pē ‘i he lotu fakataha kia Sihová ‘e tokoni ia ki he tokotaha kotoa ‘i he fāmilí ke ne fiefia ‘i hono ako ‘a e Folofola ‘a e ‘Otuá, pea te ne tāpuaki‘i lahi ho‘omou ngaahi feingá.​—Saame 1:1-3.

• Ko e hā ‘oku mau vahe‘i ai ‘a e taimi ki he lotu fakafāmilí?

• ‘E lava fēfē ke ‘ai ‘e he ngaahi mātu‘á ‘a e taimi ko ení ke fakafiefia ki he tokotaha kotoa ‘i he fāmilí?