Өг-бүлелер бүзүрелин болгаш аразында харылзаазын быжыктырып, үени кады эрттирер кылдыр, Иегова кезээде күзеп чораан (Ы. х. к. 6:6, 7). Ынчангаш Иегованың Херечилери неделя санында өг-бүлези-биле чүдүүр үени аңгылап ап турар. Ол дээрге хостуг байдалга библейжи темаларны кады сайгарары дээни ол. Олар материалды өг-бүлезиниң хереглелдеринге таарыштырарын кызыдып турар. А бир эвес кижи чааскаан чурттап турар болза, ол үени Бурган-биле кады эрттирип, кандыг-бир эптиг программа-биле Библияны хууда өөренип болур.

Ол Иеговага чоокшулаарынга дузалап турар. Библияда: «Бурганче чоокшулаңар, Ол база силерже чоокшулап кээр» — деп бижээн (Иаков 4:8). Иегованы эки билип алырынга ооң Сөзү биске дузалап турар, ында ооң шынарларының болгаш ажыл-херээниң дугайында бижээн. Өг-бүлези-биле чүдүүр үени Библияның ыыткыр номчулгазындан эгелеп ап болур, чижээ, неделя санында «Чуртталгалывыс болгаш бараалгалывыс» деп ужуражылганың графиги ёзугаар. Эгелерни үзүндүлерге чаргаш, кижи бүрүзүнге дагзып калыңар. Номчулга соонда кижи бүрүзү бодунга кандыг ажыктыг бодалды тып эскергенин үлежип болур.

Ол өг-бүлени быжыктырып турар. Библияны кады өөренири ашактарны кадайлары-биле, ада-иелерни ажы-төлү-биле чоокшуладып турар. Шак ындыг өөредилге бүгү өг-бүлеге четтикпейн манаары, өөрүнчүг болуушкун боор ужурлуг. Ада-иелер ажы-төлүнүң назы-харынга дүгжүп турар материалды шилип алыры чогуур. Чижээ, ажы-төлдүң школага таваржып турар бергелерин, Библияга үндезилээн дептерлерден статьяларны, ол ышкаш сайтывыстан материалдарны ажыглап тургаш, кады сайгарыңар. Онлайн-телевидениевистен кандыг-бир программаны көргеш, ону чүге кады сайгарып болбас деп? Чоокку болур ужуражылгага күүсеттинер ырыларны ырлажып-даа болур силер. А сөөлүнде чаагай чем чип азы ойнап болур.

Бир эвес өг-бүле неделя санында Иеговага чүдүүр үени үндүрүп турар болза, өг-бүлениң кежигүн бүрүзү Бурганның Сөзүнге ынак апаар. Иегова силерниң күжениишкиннериңерни элбээ-биле йөрээр дээрзинге ыяк бүзүреңер (Ырлар 1:1—3).

• Өг-бүлевис-биле чүдүүр үени чүге аңгылап ап турар бис?

• Ада-иелер өг-бүлези-биле чүдүүр үени кежигүн бүрүзүнге солун кылдыр, канчаар эрттирип болурул?