Иеговалэн котьку потэ вал, семьяос дырзэс ӵош мед ортчытозы шуыса, духовно будыса но семья кусыпъёссэс юнматыса (Кыкетӥ Закон 6:6, 7). Соин Иеговалэн Адӟись-Ивортӥсьёсыз котькуд арняе дырзэс висъяло семьяен йыбырттонлы — духовной юанъёсты капчи мылкыдын эскеронлы. Соос материалэз семьязылэн кулэяськонъёсызлы тупатыны тыршо. Тӥ огнады улӥськоды ке, со дырез луоз кутыны, Инмарен кусыпъёстэс юнматон понна но тӥледлы тупась амалэн Библиез дышетон понна.

Со Иеговалы матэгес каре. «Инмарлы матэ кариське, Со но тӥляд матады лыктоз»,— верамын Библиын (Иаков 4:8). Иеговаез умойгес тодыны милемлы юрттэ солэн Кылыз, кудаз верамын солэн сямъёсыз но ужъёсыз сярысь. Семьяен йыбырттондэс кутскыны быгатоды Библиысь люкетъёсты шара лыдӟонэн, кудъёссэ эскерозы Инмарлы ужан-тыршон школаын. Текстэз пичи люкетъёслы люке но семьяысьтыды котькудӥзлы сётэ. Лыдӟем берады вералэ, лыдӟем кылбуръёсысь кыӵе пайда котькудӥз аслыз басьтӥз.

Со семьяез огазея. Библиез ӵош дышетон картъёсты но кышноосты, озьы ик анай-атайёсты но нылпиосты огазея. Сыӵе дышетон быдэс семьялы шумпотон вайись но кема возьмам дыр луыны кулэ. Анай-атайёслы нылпиоссылэн арлыдзыя темаез бырйыны кулэ. Кылсярысь, нылпиосын луоз вераськыны шуг-секытъёс сярысь, кудъёсыныз соос школаын пумисько. Дышетске кырӟаны кырӟанъёсты, кудъёсыз вуоно пумиськонын луозы. Нош семьяен йыбырттон бере ческыт сиён пӧралэ яке шудэ.

Котькуд арняе Иеговалы ӵош йыбырттонлы дыр висъяса, быдэс семья Инмарлэсь Кылзэ яратыны быгатоз. Оскелэ, Иегова тӥлесьтыд тыршемдэс бакель кароз шуыса (Псалтирь 1:1—3).

• Малы ми семьяен йыбырттонлы дырмес висъяськомы?

• Кызьы анай-атайёс семьяен йыбырттонзэс быдэс семьязылы тунсыко карыны быгато?