قدیم زمانے سے خدا کی مرضی ہے کہ گھر والے مل کر اُس کے کلام پر غور کریں اور یوں اُس کے اور ایک دوسرے کے زیادہ قریب ہو جائیں۔‏ (‏استثنا 6:‏6،‏ 7‏)‏ اِس لئے یہوواہ کے گواہ ہر ہفتے خاندانی عبادت کے لئے ایک وقت مقرر کرتے ہیں۔‏ اِس دوران گھر والے مل کر بےتکلفی سے ایسے موضوعات پر بات‌چیت کرتے ہیں جو اُن سب کے لئے فائدہ‌مند ہوتے ہیں۔‏ اگر آپ اکیلے رہتے ہیں تو آپ اِس وقت کو بائبل کے کسی موضوع پر تحقیق کرنے کے لئے استعمال کر سکتے ہیں۔‏

خاندانی عبادت خدا کے زیادہ قریب ہونے کا موقع ہے۔‏ بائبل میں لکھا ہے:‏ ”‏خدا کے قریب جائیں تو وہ آپ کے قریب آئے گا۔‏“‏ (‏یعقوب 4:‏8‏)‏ جب ہم پاک کلام سے خدا کی صفتوں اور اُس کے کاموں کے بارے میں سیکھتے ہیں تو ہم یہوواہ خدا کو بہتر طور پر جاننے لگتے ہیں۔‏ اِس لئے شاید آپ خاندانی عبادت کے شروع میں بائبل کے کچھ باب پڑھ سکتے ہیں،‏ مثلاً وہ باب جن پر اُس ہفتے مسیحی زندگی اور خدمت والے اِجلاس میں غور کِیا جائے گا۔‏ گھر کا ہر فرد باری‌باری کچھ آیتیں پڑھ سکتا ہے اور پھر سب مل کر اِس بات پر غور کر سکتے ہیں کہ اُنہوں نے کیا سیکھا ہے۔‏

خاندانی عبادت اپنے گھر والوں کے زیادہ قریب ہونے کا موقع ہے۔‏ جب گھر والے مل کر خاندانی عبادت کرتے ہیں تو اُن کا آپس کا بندھن مضبوط ہوتا ہے۔‏ یہ ایک ایسا موقع ہونا چاہئے جس کے لئے سب شوق سے جمع ہوں اور جس سے سب لطف اُٹھائیں۔‏ بچوں کی عمر کے مطابق والدین ایسے موضوعات کا انتخاب کر سکتے ہیں جو بچوں کے لئے فائدہ‌مند ہوں۔‏ شاید وہ مینارِنگہبانی اور جاگو!‏ کے رسالوں میں سے یا ہماری ویب‌سائٹ jw.org پر کچھ مضامین پر غور کر سکتے ہیں۔‏ اگر بچوں کو سکول میں کسی مسئلے کا سامنا ہو تو اِس پر بھی بات کی جا سکتی ہے۔‏ آپ جےڈبلیو براڈکاسٹنگ (‎tv.pr418.com‎) پر کوئی پروگرام دیکھ سکتے ہیں اور پھر اِس پر بات کر سکتے ہیں۔‏ آپ اُن گیتوں کی مشق بھی کر سکتے ہیں جو اجلاسوں پر گائے جاتے ہیں۔‏ خاندانی عبادت کے بعد چائے شائے کا اِنتظام بھی کِیا جا سکتا ہے۔‏

اگر سب گھر والے ہر ہفتے مل کر پاک کلام کا مطالعہ کرتے ہیں تو اُن کو بڑی خوشی ملتی ہے اور وہ بہت سے فائدے حاصل کرتے ہیں۔‏—‏زبور 1:‏1-‏3‏۔‏

• ہم خاندانی عبادت کے لئے ایک وقت کیوں مقرر کرتے ہیں؟‏

• والدین کیا کر سکتے ہیں تاکہ سب گھر والے خاندانی عبادت سے لطف اُٹھائیں؟‏