Tikang pa hadto, karuyag ni Jehova nga may panahon an tagsa nga pamilya nga magkaurosa basi maparig-on an ira espirituwalidad ngan an ira relasyon ha kada usa. (Deuteronomio 6:6, 7) Ito an rason kon kay ano nga naggagahin kami hin panahon kada semana para ha pagsingba sugad nga pamilya. Dida hiton relaks nga kahimtang, ginhihisgotan namon an espirituwal nga mga butang nga amon ginkikinahanglan. Bisan kon nag-uusahan ka, puydi mo gihap gamiton an sugad nga panahon para ha pag-aram ha Biblia ha topiko nga imo karuyag.

Panahon ito basi magin mas duok kan Jehova. “Pahirani kamo ha Dios, ngan mahirani man hiya ha iyo.” (Jakobo 4:8) Mas makikilala naton hi Jehova kon nahibabaroan naton an mga detalye han iya personalidad ngan han iya mga ginbuhat pinaagi han iya Pulong. An masayon nga paagi ha pagtikang han pagsingba han pamilya amo an pagkaada oras ha pagbasa han Biblia ha daku nga tingog, mahimo sundan an sinemana nga eskedyol han Teokratiko nga Eskwelahan ha Ministeryo. Mahimo liwat itoka ha tagsa nga membro han pamilya an pagbabasahon, ngan an ngatanan puydi makigbahin ha paghisgot han mga butang nga hinbaroan tikang ha Biblia.

Panahon ito basi magin mas duok an mga membro han pamilya. An pag-aram han Biblia sugad nga pamilya nagpaparig-on han relasyon han mag-asawa, ngan han mga kag-anak ha ira mga anak. Sadang ito magin makalilipay, nagkakaurosa, ngan ginpapamulat nga takna ha kada semana. Depende ha edad han mga anak, an mga kag-anak mahimo pumili hin praktikal nga mga topiko ha An Barantayan ngan Pagpamata! o ha aton Web site nga jw.org nga maangay ha ira. Mahimo paghisgotan an mga problema nga naieksperyensyahan han iyo mga anak ha eskwelahan ngan kon paonan-o nira ito malalamposan. Mahimo liwat praktison an mga kakantahon ha mga katirok ngan magmeryenda katapos han pagsingba han pamilya.

Inin espesyal nga gab-i kada semana nga nakasentro ha urosa nga pagsingba kan Jehova mabulig ha ngatanan ha pamilya nga makabiling hin kalipay ha pag-aram han Pulong han Dios, ngan hura nga bibendisyonan ni Jehova an iyo pangalimbasog.—Salmo 1:1-3.

• Kay ano nga naggagahin kita hin panahon para ha pagsingba han pamilya?

• Ano an sadang himoon han mga kag-anak basi magin makalilipay ito?