Yɛ̂ɛ berei è wɔlɔ kɛ́ lai, Ziova a ŋwɛ̂lii káayɔɔ-ŋa díkɛ Ɣâla mɛni maa-kɔ́ri gîe ma, nyíŋi a dílaa-lai su kpanáŋ e ŋɔ́nɔ gɛ̀ gáalaai su ɓela díkɛ zu tɔnɔ. (Dutɛrɔnome 6:6, 7) Mɛni ma, Ziova Ŋɔsêre-faa kɛ́-ɓelai da fólo tɔnɔ see lɔ́ɔ-kuu kélee su à gɛ́ɛ dí Ŋâla-kɔlɔi maa-kɔ́ri da díkáayɔɔ-ŋai gîe ma. Gáayɔɔ ɣâla-kɔlɔ maa-kɔ́riɛ ŋí su, da mɛni-ŋai maa-kɔ́ri nyii a kpɔŋ maa tɛɛ dípɔ à gɛ́ɛ dí dítɔɔ̂i kpanáŋ naa-lai su. À kɛ̀ máŋ I káa a gòyaŋ, ya tãi siɣe à gɛ́ɛ I Ŋâla-kɔlɔi maa-kɔ́ri lɔ́ɔ-kuu kélee, ya pâi mɛni lɛ́lɛɛ támaa maa-kɔ́ri nyii pâi I lɛɣɛi a Ziova.

A gɛ̀ kú lɛɣɛ a Ziova. “Ká lɛɣɛ a Ɣâla, nyaŋ a pâi lɛɣɛ̂i a káa.” (Zĩi 4:8) Kwa pɔri Ziova kɔ́lɔnii a nɛ́lɛɛ à kɛ̀ kwa mɛni támaa maa-kɔ́ri é pîlaŋ dûa-pere da gɛ́ mɛni-ŋa dîa Ŋâla-kɔlɔi su. Berei lɛ́lɛɛi dɔnɔ ya pɔri íkáayɔɔ ɣâla-kɔlɔ maa-kɔ́riɛ kɔ́ɔ pîlanii lai ɓa, ká pɛlɛ Ŋâla-kɔlɔi lónoi gîe ma. Tãi ta ka pɔri kpîŋ ŋâla-kɔlɔ-kpuai da mò à gɛ́ɛ kú nóno lɔ́ɔ-kuu kélee yɛ̂ɛ berei gáa la Díkɛ-ɣeniɛi Da Díɣâla-woo-ɓo Tíi Koyâŋ su. Ya pɔri ŋâla-kɔlɔ-kpua-ŋai ŋá-kɔlɛi íkaayɔɔ̂i su ɓela dîa nóno mɛni ma; ka kpɛɛ nónoi, dímarê-kɛ́ à gɛ́ɛ dí m̀ɛni-ŋai lɛ́ dí maa-kɔ́ri Ŋâla-kɔlɔi sui.

A gɛ̀ ka íkaayɔɔ̂i ka kɛ-zu-tɔnɔ, wɛli-kɛ-maa su. Surɔ̂ŋ da ŋɔnɛnî, lóŋ kaa-ɓela da dílônii da díwɛli-kɛ-maa su kpanáŋ díkîe-ni mɛni ma à kɛ̀ da Ŋâla-kɔlɔi maa-kɔ́ri gîe ma. Maa nɛ̂̃ɛi gáayɔɔ ɣâla-kɔlɔ maa-kɔ́riɛ ŋí é kɛ́ a lii-nɛ̃ɛ da lii-laa tãi nyii gáalaai su ɓelai kélee da ŋwɛ̂li maa tãi é seri lɔ́ɔ-kuu kélee. Dí lɛɛ pâi mɛni-ŋuŋ ta siɣêi m̀aa-kɔ́ri mɛni ma, nɛ́lɛɛi lóŋ kaa-ɓela dí díkili ŋa sia é pîlaŋ dílônii kóraŋ ma. Nyíŋi a kpɔŋ maa tɛɛ dípɔ à gɛ́ɛ dí nia-wooi kɔ́ri nɛ́lɛɛi dílônii mɛni ma. Da pɔri mɛni-ŋuŋ támaa káai The Watchtower da Awake! su, kpaa jw.org/xpe fãa ŋa. Ka pɔri tivi program-ŋai ta káai JW Broadcasting (tv.pr418.com). Ka pɔri ŋule-ŋai kwa pâi dooi kúkoyâŋ-ŋai su nɔ́ɔ-kuui ŋí sui maa-kɔ̂rii. Nyaŋ ka kpɛɛ gáayɔɔ ɣâla-kɔlɔ maa-kɔ́riɛ ma, ka pɔri ŋɔ́nɔ lii-nɛ̃ɛ kula gîe ma, ka mii-sɛŋ mii gîe ma.

À kɛ̀ ka Ŋâla-kɔlɔi maa-kɔ́ri lɔ́ɔ-kuu kélee, ká kɛ́ Ziova fɛli gîe ma, gɛ̀ ní, íkaayɔɔ̂i su ɓela da pâi Ŋâla-kɔlɔi wɛ́lii kpɔ́ a ŋánaa, nyaŋ Ziova a pâi lûwa laai káa.—Wule-woo-ŋa 1:1-3.

• Lé mɛni ɓé kwa tãi siɣe lai káayɔɔ ɣâla-kɔlɔ maa-kɔ́ri mɛni mai?

• Lé ɓé lóŋ kaa-ɓela da pɔri gɛ́i à gɛ́ɛ dí díkáayɔɔ ɣâla-kɔlɔ maa-kɔ́riɛ tãi kɛ́ a lii-nɛ̃ɛ tãi?