Tona thama, Yehova weta tia ti batu va dikanda baviokisanga thangu va kimosi mu diambu bakindisa nguizani yawu ayi Nzambi ayi bawu yi bawu. (5 Mose 6:6, 7) Diawu, mabuta ma Zimbangi zi Yehova beta sobula lumbu kimosi mu sabala mu diambu di sambila Nzambi vakimosi mu phila yoyi mutu woso kakukimuena mbote. Mu zithangu beni, beta soludila mambu ma Nzambi momo madi nguizani ayi tsatu yi dibuta diawu. Buba ngeyo veka weta zinga, lenda sobula thangu muingi wuba kithuadi ayi Nzambi; mu kifuani lenda longuka disolo dimosi di Bibila dio sobudi.

Yidi thangu yifikimina kudi Yehova. Bibila tubidi ti: “Bika lufikama vadi Nzambi ayi niandi wela kulufikama.” (Yakobi 4:8) Tueta kuiza zaba Yehova mbotembote mu thangu tulembo longuka bumutu ayi mavanga mandi mu nzila Bibila, Phova andi. Phila yi mboti yi longukila tsambudulu va dibuta yidi mu tanga vakimosi Bibila mu mbembo yi ngolo. Mu kifuani, lulenda landakana programi yi Kalasi yi Kisalu ki Teokrasi yi sabala yina. Lulenda vana mutu mosimosi va dibuta tini ki Bibila kioki kafueti tanga, ayi beno manisa, mutu woso wu dibuta kalenda tubila dilongi dio kabeki.

Yidi thangu yoyi yeta tula ti nguizani va dibuta yiba yiwombo. Nguizani yi bakala ayi nketo ayi bana yeta kuiza ba yi ngolo ti balembo longuka Bibila va dibuta. Yifueti ba thangu yi kiese ayi yi ndembama yoyi batu beta vingila mu ntima wu yangalala sabala zioso. Bambuta beta sobula malongi ma mfunu mu bana bawu mu tadila mimvu miawu. Mu kifuani, balenda tubila diambu dimosi diodi bana beta dengana ku nzo-nkanda, ayi bue busundudila diawu. Balenda sadila mintu mi masolo mio mieta bima mu Nzo yi Nkengidi [Linɔ́ngi ya Mosɛnzɛli], mu Lamuka! Voti mu site yeto jw.org. Lulenda longuka diaka maluimbu momo mela yimbulu mu zikhutukunu, ayi dia voti nua kima ku manima ma ndongokolo.

Thangu yoyi lulembo viokisa kadika sabala mu sambila Nzambi va kimosi yela sadisa wumosimosi va dibuta dieno kayangalala longuka Bibila ayi Nzambi wela sakumuna zingolo ziozi lulembo tudi.—Nkunga 1:1-3.

• Bila mbi tueta sobudila lumbu kimosi mu diambu di tsambudulu mu dibuta?

• Mbi bambuta balenda tula muingi thangu beni yiba yi kiese kudi dibuta dioso?