Diidi-​mani fotoonba, beepo ke bi niba kuli pala mani? Bi ye a taancianma kaanu. Nani U Tienu n den yedi o niba o yogu nni ke ban taani taalima taa binli kuli yeni, ti moko jegibi ki guu ti taancianma yeni. (Mi Tiadima 16:⁠16) Binli kuli ti pia taancianma a taa: dayenli taancianli bonbi lie, leni danataa taancianli. Laa taancianma puuni-​ti bee ñoadi?

Li pugindi tin taani ki loli leni tiyaba maanma. Nani Isalele niba pala n den mani bi yaa den pagi U Tienu “li nitaanli nni”, timo yaa taagi ki kpiagi U Tienu ti taancianma nni, li mangidi ti pala. (Pisomi 26:⁠12; 111:⁠1) Laa yogunu ti laadi ti kpiiba yaaba n ye nitaana toe nni bi dogi toe nni. Bi niba kuli kpendi leni bi jiema ke mi fuodima yogunu yaa pundi ti li dii lanpo. Li todi ke ti boe leni yaba ke li puuni li pamanli. (Jesu Tondiba Tuona 2:⁠42) A taancianma nni, ti bani cain ke ti tie ŋanduna kuli kpiiba yaaba n bua biyaba.​—⁠Pieli Tikpiali 2:⁠17.

Li todi ti ke ti caa liiga U Tienu ŋoadima nni. Isalele yaaba pala den mani bi yaa “den bundi bipo” U Tienu maama. (Nehemi 8:8, 12) Ti taancianma nni ti pala mani kelima ti baadi yaa bangima n ñan biibili nni. Taancianli kuli mayulicianli ñan biibili nni. Ti cengi mi maadikaama, ki go diidi mi togidi wangima yaala n todi-​ti, tin ŋanbi ŋoadi U Tienu ti yema nni. Ti go cengi i yini buali yaala n wangi-​ti ti kpiiba n tuo Jeova maanma bi yema nni, ke li puuni-​ti li dandanli papaali. Danataa taancianli yeni yogunu, ti yen diidi teyatri yaala n ñan biibili nni. Li tundi-​ti ki go todi-​ti ke ti ŋanbi nua biibili yeni labaali ti yama nni. Taancianli kuli yogunu, yaaba n bua yeni, yen tua batisi. Bi wangi yene ke bi ta bi yema ki teni Jeova ki baa tieni O yanbuama.

• Beepo ke ti pala mani leni ti taancianma yeni?

• Ti taancianma puuni-​ti bee ñoadi?