Ekuma wantu awaya benena ye kiese? E kuma kadi mu lukutakanu lweto lwampwena bena. Nze una selo ya Nzambi kuna nz’ankulu bakasakeswanga mu lungana nkumbu tatu muna mvu muna tukutakanu twampwena, oyeto mpe tusutilanga o tukutakanu twampwena mu lungana kumosi ye mpangi zeto. (Nsiku 16:16) Konso mvu, tulungananga nkumbu tatu muna tukutakanu twampwena nze: Tukutakanu tole twa zunga mu lumbu kimosi ye lukutakanu lwa mvivu lwa lumbu tatu. Nkia nluta tubakanga muna tukutakanu twatu??

Tukumikanga e kintwadi kieto kia Kikristu. Nze una Aneyisaele bayangalelanga mu kembelela Nzambi ‘vana ven’e bundu,’ oyeto mpe tuyangalalanga lungana kumosi ye mpangi zeto muna tukutakanu twatu twamfunu. (Nkunga 26:12; 111:1) Tukutakanu twatu tukutuvananga elau dia lungana kumosi ye mpangi zeto bena muna nkutakani yovo nsi zakaka. Muna ntangw’a vunda, tudilanga vamosi yo siamisa kikundi kieto. (Mavangu 2:42) Muna tukutakanu twatu, tumonanga una zola kusiamisinanga e kintwadi kieto kia “wana-ngudi” omu nz’amvimba.—1 Petelo 2:17.

Tukutusadisanga mu nungunuka muna mwanda. Aneyisaele babakanga mpe e nluta vava ‘babakulanga mambu’ basasilwanga muna Sono. (Nekemiya 8:8, 12) Oyeto mpe tuyangalelanga o tuludiku tutambulanga muna Nkand’a Nzambi muna tukutakanu tweto twampwena. O ntu a diambu wa konso lumbu ubongelwanga muna Sono kia Nkand’a Nzambi. Muna lusadisu lwa malongi nze elongi dia kunku yayingi ye nsongesela, tulongokanga una tulenda vangila luzolo lwa Nzambi muna zingu kieto. Tukasakeswanga vava tuwanga e nsangu za Akristu ana bewanananga ye mambu mampasi yo sunda mo mu lumbu yayi yampasi tuzingilanga. Muna lukutakanu lwa mvivu, tutalanga e fuka yiyikanga tusansu twa Nkand’a Nzambi yo kutulonga mambu mamfunu. Konso lukutakanu lwampwena, vekalanga yawana bevubwanga muna songa kiyekola kwau kwa Nzambi.

• Ekuma tukutakanu twampwena tuna se ntangw’a kiese?

• Nkia nluta olenda baka muna kalanga muna tukutakanu twatu?