Ua tantekeya vika va na viukilila ngecize ava vantu vali ha cikupulo? Vali ku ciuano. Ku ntsimbu ya ku nima Njambi ua sikile vangamba veni kuli kungulula lutatu mu muaka. Netu Vakaleho va Yehova tue kuli kungulula hamo mu vivunga via kama. (Ndeutelonomi 16:16) Mu muaka tua kala na viuano via kama vitatu: viuano via limbo vivali, nkala ciuano tangua limo lika kaha na ciuano ca muhato ca matangua atatu. Vukuasi vuka tue ku uana ku viuano evi?

Viuano vietu vieku kolesa cilemo cetu kuli vamuanetu. Ngeci mu va kele na ku viukilila vana va Isaleli mu ku sangaziala Yehova ha kati ka mbunga, netu naua tue kuli vuisa ku viuka ku lemesa Yehova ku viuano via kama. (Visamo 26:12; 111:1) Evi viuano via pua ntsimbu ya cili i tue kuli uana na ku likuata vusamba na vamuanetu va ku vi kungulukilo vikuavo na va ku vifuti vieka. Ku vuezelela ku ndzolela ya evi viuano, tu vose tue ku-lia hamo. (Vilinga 2:42) Ku viuano vietu tue ku mona cilemo cize ca tu pandakana mu “[civunga cose NW] ca va muanetu” ha mavu ose.​—1 Petulu 2:17.

Viuano vietu vie ku tu kolesa mu lutsilielo. Vana va Isaleli va vezikile cikuma muomu “va vuile mezi a va va ambuluilile”. (Nehemiya 8:8,12) Netu tue ku viukilila omo lia vilongesa via Mbimbiliya vi tue ku-ivua ku viuano. Mitue ya vimpande viose ye ku fuma mu Mbimbiliya. Ku hitila mu vimpande, Mitue ya vilongesa ya kuli kava na vilekesa via kuya ku mutima, tue kuli longesa mua ku pangela cizango ca Njambi mu miono yetu. Ku-ivua mizimbu ya ku kolesa ca vamuanetu mu li Kilistu nga vali mu visoti ce ku tu simpisa. Vueho vua mu Mbimbiliya vue ku puisa mizimbu ya laza ya Mbimbiliya ngue ya lelo, kaha tue kuli longesa vize vi silivila ku miono yetu. Ku viuano via kama viose, kue ku kala ku mbatiza ca vaze va na muesa ku mbunga nguavo va na kundama kuli Njambi.

• Omo lia vika Viuano via pua ntsimbu ya ndzolela ku Vakaleho va Yehova?

• Vika u hasa ku ka vezika nga u ka soloka ku ciuano?