Omolwashike aantu mbaka taya monika ya nyanyukwa? Oye li pushimwe shomiigongi yetu. Ngaashi aapiya yaKalunga yonale mboka ya li ya lombwelwa ya kale haya gongala pamwe lutatu momumvo, natse ohatu kala twa tegelela nondjuulukwe oku ka gongala pamwe piigongi. (Deuteronomium 16:16) Kehe omumvo ohatu kala tu na iigongi itatu: Oshigongi shesiku lyi ikalekelwa, oshigongi shopashikandjo shomasiku gaali, noshigongi shoshitopolwa shomasiku gatatu. Uuwanawa wuni hatu mono po piigongi mbika?

Ohayi tu kwathele tu kale tu na ekwatathano lyuumwayinathana wopaKriste lya kola. Ngaashi naanaa Aaisraeli yonale ya li haya nyanyukilwa okutanga Jehova “megongalo lyaantu ye,” natse ohatu nyanyukilwa oku mu longela piigongi mbika yi ikalekelwa. (Episalomi 26:12; 111:1) Iigongi mbika ohayi tu pe ompito yokweendathana nOonzapo dhokomagongalo galwe nenge nokuli dhokiilongo yilwe. Pokati komutenya ohatu tyapula omwiha pamwe pehala mpoka tapu ningilwa oshigongi, shoka hashi gwedha ko kombepo ombwanawa yohole ndjoka hayi kala piigongi mbika yopambepo. (Iilonga 2:42) Piigongi ya tya ngeyi ohatu imonene ko tse yene nkene ohole ndjoka ye tu hanganitha ‘nooitaali ooyakwetu’ muuyuni auhe. — 1 Petrus 2:17.

Ohayi tu kwathele tu hume komeho pambepo. Aaisraeli nayo oya li ya mono uuwanawa sho ‘yu uvu ko’ Omanyolo ngoka ya fatululilwa. (Nehemia 8:8, 12) Natse ohatu kala tu na olupandu omolwelongo lyopaMbiimbeli ndyoka hatu mono kiigongi yetu. Oshigongi kehe ohashi kala shi na oshipalanyolo sha kankamena kOmbiimbeli. Iipopiwa tayi pendutha ohokwe, iipopiwa ya pambathana nosho wo omauliko ohage tu kwathele tu ilonge nkene tu na okulonga ehalo lyaKalunga monkalamwenyo yetu. Ohatu ladhipikwa uuna tatu pulakene kiimoniwa yayalwe mboka ya pondola okusinda omashongo ngoka haga adha mboka ya hala okukala nokukalamwenyo kwopaKriste momathimbo ngaka omadhigu. Poshigongi shomasiku gatatu ohapu ningwa oshinyandwa shoka hashi tu kwathele tu kale twa fa tu wete mboka ya hokololwa mOmbiimbeli nohashi tu longo iinima mbyoka tatu vulu okutula miilonga. Poshigongi kehe mboka ya hala okuulika kutya oyi iyapulila Kalunga ohaya ninginithwa.

• Omolwashike ethimbo lyiigongi li li ethimbo lyenyanyu?

• Uuwanawa wuni to vulu okumona ngele owa kala ho kala piigongi?