Hana wa’omuso sibai dödö ndra niha da’a? No möi ira ba gangowuloa sebua nifaluama. Simane ono mbanua Lowalangi meföna ibe’e khöra goroisa Yehowa ena’ö owulo ira tölu kali ba zi döfi, andrö mabase-base’ö hawa’ara ginötö owulo ndra’aga zui. (V Moze 16:16) Tölu kali mafalua gangowuloa sebua ero röfi: dua kali mufalua kebaktian wilayah fa’arania sahari ba so kebaktian regional fa’arania tölu hari. Hadia gunania khöma na ma’ondrasi gangowuloa andrö?

Aro wa’afatalifusötama. Simane fa’omuso dödö ndraono Gizara’eli ba wanuno Yehowa ”ba zowulo niha”, Simanö göi wa’omuso dödöma na möiga ba gangowuloa sebua ba wamosumange Lowalangi. (Zinunö 26:12; 111:1) Falukha ndra’aga ndra talifusö Samaduhu’ö Yehowa moroi ba mbanua bö’ö ba fariawö ndra’aga khöra. Manga ndra’aga ba zi talu ma’ökhö ba nahia gangowuloa, irege owua-wua dödöma ba wamati (Halöwö Zinenge 2:42) Ba da’ö ma’ila te’osambua’ö ndra’aga ba wa’omasi ”watalifusöta” ba zi sagörö ulidanö.—I Fetero 2:17.

Tetolo ndra’aga ena’ö tedou ba wamati. Moguna ba ndraono Gizara’eli me no ”aboto ba dödöra” zi no labotokhi moroi ba Zura Ni’amoni’ö. (Nehemia 8:8, 12) Ma’andrö saohagölö wamaha’ö ba Zura Ni’amoni’ö si no matema ba gangowuloa andrö. Ero sakali owulo so duhonia te’odane-dane ba Zura Ni’amoni’ö. Ba huhuo nifa’ema, duma-duma nibe’era sadöni dödöda, tola tefaha’ö ndra’aga lala ba wamalua somasi Lowalangi ba wa’aurima. Omuso sibai dödöma memarongo so ndra talifusö sanaögö abula dödö ba ginötö wamakao me tobali ira niha keriso. Ba kebaktian regional, ladumaigö hikaya ba Zura Ni’amoni’ö sitobali famaha’ö. Ero sakali owulo, so wamayagö idanö ba niha somasi molulu fa’aurinia khö Lowalangi.

• Hana wa tobali fangomuso dödö gangowuloa andre?

• Hadia gunania na ta’ondrasi gangowuloa andre?