Dikhen, sar ala manuša radisaľon, soske? Avle pre amaro zjazdos. Avka, sar varekana, le Devleskere služobňika pes zdžanas trival andro berš the amen pes našťi doužaras, sar pes zdžaha ajci but manušenca. (5. Mojžišova 16:16) Sako berš amen hin trin zjazdi: duvar andro berš hin krajsko zjazdos, so hin jekh ďives the baro zjazdos, so hin trin ďives. So pes ode sikavas?

Pomožinen amenge, kaj buter te kamas amare kresťanske phralen. O Izraelčana radišagoha ašarenas le Jehovas maškar o but manuša, avka the amen ada keras pre amare zjazdi. (Žalm 26:12; 111:1) Ode šaj sprindžaras phralen the pheňen andal aver zbori abo krajini. Pro zjazdi peske šaj anas varesavo chaben a sar hin pro dilos prestavka, ta šaj ode savore jekhetane chas. Avka pes ode šunaha mište sar maškar o kamarata. (Skutky 2:42) Pre peskere jakha dikhaha a andro jilo šunaha e laska, so amen sphandel amare kresťanske phralenca pal calo svetos. (1. Petra 2:17)

Pomožinen amenge te el feder kresťana. Le Izraelčanen sas užitkos, hoj achaľonas oleske, so pes genelas andal le Devleskero lav. (Nehemiáš 8:8, 12) The amen rado peske las ko jilo biblicko goďi, so šunas pre amare zjazdi. Calo zjazdovo programos sikavel e goďi andal e Biblija. Ode hin šukar prednaški, simpozija the scenki, so amen sikaven, sar te dživel sar prava kresťana. Varesave ode phenen pal ada, so lenge pomožinďa te ačhel verna le Devleske andre kada nalačo svetos. Pro bare zjazdi šaj dikhen the o drami, so pes bavinen andro kostimi. Anglo jakha amenge obdživena o biblicka pribehi a šaj pes lendar but sikavas. Pre dojekh zjazdos pes den te bolel (pokrsťinel) ola, so andro peskero jilo sľubinde le Jehovaske, hoj leske služinena calo dživipen.

• Soske hin prekal amende o zjazdi sar šukar inepi čiže svjatki?

• So šaj dikhen a šunen pro zjazdos?