Бу адамлар нәме үчин шатланярлар? Себәби олар конгресе гелдилер. Гечмишде яшан Худайың гуллукчылары йылда үч сапар йыгнанышмалыдылар. Шу гүнлер биз хем көпчүлик болуп душушярыс ве шейле душушыклара сабырсызлык билен гарашярыс (Канун таглыматы 16:16). Биз хер йыл үч саны конгрес гечирйәрис: ики саны бир гүнлүк этрап конгреслери ве үч гүнлүк себит конгреси. Бу душушыклар бизе нәхили пейда гетирйәр?

Бүтиндүнйә доганлыгымызы беркидйәр. Гадымы ысрайыллылар «йыгнакларда» Ехованы шатлык билен шөхратландырыпдырлар. Шу гүнлер биз хем Ехова шатлык билен сежде этмек үчин конгреслере барярыс (Зебур 26:12; 111:1). Шейле душушыклар бизе башга йыгнаклардан ве юртлардан гелен доган-уялар билен танышмага хем-де гүррүңдеш болмага мүмкинчилик дөредйәр. Биз аракесме вагты конгрес гечирилйән ерден узага гитмән, доган-уялар билен гүнортанлык нахарыны иййәрис ве олар билен гүррүңдеш болуп, достлашярыс (Ресулларың ишлери 2:42). Биз конгреслерде бүтиндүнйә доганлыгымызы беркидйән сөйгини гөрйәрис (1 Петрус 2:17).

Рухы тайдан өсмәге көмек эдйәр. Ысрайыл халкы Мукаддес Язгылардан пейда алар ялы, олара Худайың канунының «сөзлери дүшүндирилйәрди» (Нехемя 8:8, 12). Биз хем конгреслерде Мукаддес Язгыларың эсасында берилйән гөркезмелери гыммат сайярыс. Оларда гүррүң эдилйән темалар Мукаддес Язгылара эсасланяр. Биз конгреслерде чыкыш эдилйән гызыклы нутуклар ве сахналар аркалы Худайың ислегини берҗай этмеги өвренйәрис. Шейле-де биз имандашларымызың кынчылыклара нәдип хөтде гелендиклерини эшидип, өрән рухланярыс. Себит конгреслеринде Мукаддес Язгылардакы вакалар сахналашдырылып гөркезилйәр. Онда чыкыш эдйәнлер шол дөвре лайык эгин-эшиклер гейип, сахнаны җанландырярлар. Шейле сахналар бизе пейдалы затлары өвредйәр. Хер конгресде өзүни Худая багыш этмек ислейәнлер сувда чокундырылярлар.

• Нәме үчин конгреслер көп шатлык гетирйәр?

• Конгреслере бармагың нәхили пейдасы бар?